Xarpêt de vizêr startê Festîvala Kultur û Xoza ya Depe ya Yewine ame dayene. Roja yewine de xeylêk hunermendan konser da.

Konserî ra verî Hemşaredaranê Depe Songule Duzgun û Cafer Ogurî qisey kerd û hêrişê vera kurdkî şermezar kerdî.

Dima Koroyê Domanan ê KAYY-DERî vejîya sehne ser. 

Hemserekê Pêroyî yê DBPyî Keskîn Bayindir zî vejîya sehne ser û xîtabê girseyî kerd. Bayindir Mazlûm Dogano ke Depe ra yo yad kerd. Bayindirî bale ante hêrişanê vera kurdkî ser û vat: ''Ê se kenê wa bikerê ma do tim wayîrê ziwan, kultur û xozaya xo vejîyê. Şarê Çewlîg, Dêrsim û Xarpêtî do îşxal û talanê xoza qebul nêkero û  xo ver bido. Vera têkoşînê ma teda û hêrişî est ê. La qet yew hêz nêeşkeno heqê têkoşînê kurdan ra bêro.''

Qiseykerdişê Bayindirî ra dima  Koma Sideng, Babetna, Mikail Aslan û Diyar 23 vejîyayî sehne ser. Beşdaranê festîvale bi saetan pîya govende girewte.

Festîvale ewro zî do bi aktîvîteyanê cîya-cîyayan dewam bikera.