HPG: Qet yew zûre nêeşkena binkewtişê artêşa tirke binimna

Merkezê Îrtîbatî û Çapemenîye yê HPGyî pare kerd ke xeberê ke vanê ''artêşa tirke xeylêk şikefteyî fînayî destî û îmha kerdî'' raşt nîyê û vat: ''Qet yew zûre nêeşkena binkewtişê artêşa tirke binimna.''

Merkezê Îrtîbatî û Çapemenîye yê HPGyî (HPG-BÎM) bi eşkerayîyêke da zanayene ke xeberê ''şerê psîkolojîkî'' yê ke dewleta tirke wextê peyênî de weşanena raşt nîyê.

Eşkerayîye wina ya:

''Operasyonê îşxalî yo ke dewleta tirje ya qirkere 23ê nîsane de bi nûmayîşî dabi destpêkerdene 7 mengî û nême xo pey de ver dayî. Dewleta tirke nê wextî de pêro îmkanî xo seferber kerdî, pêro teknîk şuxilna, wehşet kerd, her roje Herêmê Pawitişî yê Medya dayî bombayan ver û bi seyan reyî çekê kîmyewî şuxilnayî. La rixmê hende çîyan zî artêşa îşxalkere pê îradeyê Apogîrî yê gerîlayan nêeşkaye û artêşa tirke reyna bin kewte.

Medyaya şerê taybetî seba ke binkewtişê artêşa tirke binimna rojanê peyênan de propagandayêka pîle kena. La pêro argumanê ci zûr ê, senaryoyê ci viraşte yê. Artêşa tirke key fam kerd do bin bikewa rixmo ke Werxelê, Tabûra Ereban û warê Qertalî ra xo apey ant îdîa kena ke şikefteyê gerîlayan vistê destî û îmha kerdê.

Eyaletê Serhedî de 30ê teşrîna verêne de unsurê bi nameyê Mazlûm (Emrah Adiguzel) û Sarîna (Pervîne Arslan) remayî, teslîmê artêşa tirke bîyî la MÎT ney sey operasyonêkê taybetî servîs keno. Hem çîyê ke serê nê unsuran ameyê vatene hem zî agahîya ke vana ê pê operasyonê MÎTî tepişîyayê ser ra heta binî zûr ê.

Hetê bînî ra xeberê ke vanê artêşa tirke her roje waranê Vakurê Kurdîstanî de vera gerîlayan 'bi hezaran operasyonan' dana destpêkerdene propagandayêka pîl a. Dewleta tirke hetêkî ra vana Vakur de gerîlayî qedîyayê hetêkê bînî ra zî vana dest pê bi seyan operasyonan kena.  Nê zî mojnenê ke dewleta tirke nêeşkena operasyonanê xo ra netîce bigêra. Coka dewlete netîceyan û qedîyayîşê nê operasyonan eşkera nêkena.

Reyna ge ge nameyê tay embazanê ma dîyenê û vajîyenê ke ê şehîd bîyê ke no zî xeberê şerê psîkolojîkî yê. Ê bi nê hawayî wazenê embazanê ma û keyeyanê înan demoralîze bikerê û zerrîya beşanê nîjadperestan ê tirkan weş bikerê. Qetî yo ke nê zûrî verê raştîye de do sey cemedî bihêlîyê. Coka ganî şarê ma yo welatperwer û rayaumûmîya demokratîke ya Tirkîya pê propaganda û şerê taybetî yê dewleta tirke bawer mekerê. Çunke ê çend zûran bikerê û senaryoyan zî virazê do nêeşkê binkewtişê xo yê Herêmanê Pawitişî yê Medya binimnê.''

Eşkerayîye de nê agahîyî zî dîyayî:

''1ê kanûne de warê Qaşûra yê herêma Metîna, 1-3ê kanûne de zî Girê Cûdîyî, Girê Şehîd Şahan, Çemço û Rênçbiraxayî yê herêma Zapî dîyayî bombayan ver.''