Serewedaritişê şaranê Îran û Rojhelatê Kurdîstanî serkêşîya cinîyan de 3 mengî yo dewam keno. Çalakîyan de heta nika 4 kesî ameyî dardekerdene, tewr  tay 500 kesî ameyî kiştene û 20 hezar kesî zî tepişîyayî.

Hunermend Hemîd Hunermendo ke Rojhelatê Kurdîstanî ra yo, ard ziwan ke xoverdayîşê 'jin, jiyan, azadî' netîceya tecrubeyanê bi desan serran o û vat: ''Cinîyê kurdî û cinîyê azadîgîrî vera zulmî têkoşîn kenê. Ma vînenê ke her şorişo ke cinîyî serkêşîya ci kenê resenê azadîye. Raşt o ke xeylêk gonîye rijîyaye la peynî de gijikê cinîyan ê şorişgêran bîyê sembolê azadîye. Seba ke dewleta Îranî hol zanena ke no serewedaritişê şaran sey ê verênan nîyo. Seba ney zî bi pêro hêzê xo verê nê serewedaritişî de vindero û her roje verê çimanê dinya de beno sebebê trajedîyanê pîlan.''

Hemîd Hunermendî dîyar kerd ke babeta sereke na ya ke şarî xo versîya dewlete û dînî ra xo bixelisnê. Hemîdî vat: ''Seba xoverdayîşî teyna vengdayîş û eşkerayîyî qîm nêkenê. Ma vînenê ke dewleta Îranî her roje teber û zîndanan de merdiman darde kena. Ganî her kes nê têkoşînî de cabigêro. Ganî verê sersefîrîyanê Îranî de nawnayîşî bêrê kerdene. Ganî partîyê sîyasîyî cepheyêkê hemparî awan bikerê. Ganî ma wayîrê şarê xo yê Rojhelatê Kurdîstanî vejîyê û paştî bidê kampanyaya Heyva Sor a Kurdîstanî.''