Rayber Apoyî 27ê sibate de vengdayîşo tarîxî kerd û PKKyî 1ê adare ra nata adirbirnayîş îlan kerd. Naye ser zaf munaqeşeyî ameyî kerdene. Ma zî waşt na babete grûbêka gerîlayan de qisey bikerê. Ma verî nê gerîlayî sarisnayî. Kênaya erebe Sena Minbic, kênaya kurde ya xorasanije Binevşe Berwar û şirnexij Sîyaroj Gabar. Badê sarisnayîşî ma vejîyayî teber û binê daran de ke newe pind kerdo dest pê qiseykerdişî kerd.

Siyaroj Gabar: Vengdayîş her kesî ser tesîro cîya kerd. Ma de zî wina bi. Zerrîya tayînan bîye teng, tayî şaş mendî, tayînan vat me senî Rayber Apo wextê ci de raşt fam nêkerd. La çîyêko ke hempar bibê ke ma pêro bîyî şa ke ma ey ra xebere girewte. Pêro dinya goş dayêne vatişanê Rayber Apoyî, ma embezê gerîlayî ewnîyayêne fotografê ey ra. Fotografê ey ma ser zaf tesîr kerd. Xora vengdayîşê ci zaf cesûr û tarîxî bi. Kam nê vengdayîş fam bikero û bîyaro ca tarîxê merdimîye de do bibo wayîrê serkewtişê pîlî. Kam ke fam mekero do bibo qûrbanê Şerê Dinya yê Hîrêyînî. Xora Rayber Apo serranê 1990î ra nata  nê cigêrayîşî de bi. Eslê xo de no vengdayîşo newe nêbi. Rayber Apoyî bi desan reyî vengdayîşê winayênî kerdî. Vengdayîşê Rayber Apoyî ser grûbê haştîye şîyî Tirkîya la ameyî tepiştene.Vengdayîşê adirbirnayîşî zî bi şerê îmhayî ameyî cewabkerdene. Dewleta tirke pêro firsetê haştîye heba kerdî, ma hêvî kenê ke na reye wina nêbo. Bi qala kilme ma vengdayîşê Rayberîya ma nê vengdayîşê Behçelîyî rê  şaş mendî. No tewirê Behçelîyî bi sebeb û netîceyanê ci bebeta cigêrayîşê zaf xorin a. Ma badê vengdayîşî dest pê munaqeşeyan kerd. Ma tecrubeyanê şorişanê bînan, prosesanê pêkerdiş, haştîye û muzakereyan ser munaqeşe kenê. Pawitişanê Rayberîye newe ra wanenê. Senî çew eşkeno hem bibo mîlîtanê şerî hem zî bibo mîlîtanê haştîye, ma nê babetan sero muaqeşe kenê. Semedê ma haştîye Rayberîya ma de têhetameyîş o.

Sena Minbic: Rayber Apo wazeno ke Şerê Dinya yê Hîrêyînî rê mudaxale bikero. Mesele hinî meseleyêka merdimîye ya. Rayberîya ma ke kurdî newe ra afirnayî,şarê Rojhelatê Mîyanênî ardî têhet û şorişê cinîyan kerd, nika wazeno heme merdimîye bîyaro têhet û mîyanê haştîye de bido ciwîyayene. Waştoşê verên ê PKKyî îspatkerdişê estbîyayîşê kurdan bi; kerd. Waranê têkoşînî abikero; kerd. Serewedaritişê vera înkarê cinîyan bi; kerd. Şaran warê demokrasîyê hemparî û seyyewbînîye de bîyaro têhet; kerd. Bi hezaran serkewtişê winayênî est ê. PKKyî rewna heme hedefê xo ardî ca. PKK vera qirkerdişanê sey Geliyê Zîlan, Dêrsim û bi desan qirkerdişanê bînan ê vera kurdan vejîya werte. Eke PKKyî şer mekerdêne, ma ewro nêeşkayêne haştîye munaqeşe  bikerê.

Binevşa Berwar: No proses gerek her hetî ra cîdî bêro destgirewtene. Eke vera nê prosesî nizdîbîyayîşo raşt nêro kerdene, çew binkewtişî ra nêeşeno xo bixelisnê. Ma babeta feskerdişî sey qedînayîşî ney, sey destpêkerdişê dewrêkê neweyî genê dest. Ronayîşê çeke zî sey teslîmîyetî ney, sey têkoşînêkê dahîna hîrayî vînenî. Xora muzakereyêk zî binate de çîn o; nê semedî ra ma çirey têkoşînî canêverdenê. No bedilyayîş gerek rewna bibiyênî la rîyê dewleta tirke ra nêbi. Nika çîyo muhîm o ke ma sey waştişê Rayberîye bikewê nê prosesî. Ma hema vizêr perwerdeyê xopawitişê vera çekanê kîmyewîyan girewt. Her roje serê ma de teyarayî, wesayîtê keşîfî gêrenê. Tay warê ma roje de bi hezaran reyî yenê bombardumankerdene. Ma newe xebere girewt ke embazê ma Besê û Mîtra bi bi çekanê kîmyewîyan şehîd bîyî. Dewleta tirke ma ra vana: ‘Ez şima pê her qeyde çekan kişena la şima çekanê xo ronê. Şima xo fes bikerê la ez meclîs de komîsyonêkê haştîye zî nêana têhet.’ Ma têna Rayberîya xo esas genê. Ma bêhêvî nîyê la ma bêtedbîr zî nîyê. Heta ke vatiş û çalakîye yew nêbi ma paştîya xo înan rê girê nêdanê.