Paytexê Îngîlîstanî London de hetê Konfederasyonê Yewîyanê Elewîyan ê Ewropa (AABK),  Federasyonê Elewîyan ê Britanya (BAF) û Yewîya Hêzê Demokratîkî yê Britanya ra bi sernameyê ''Ma qala haştîye kenê'' panel ame kerdene. Hemsereka Pêroyî ya DEM Partî Tulaye Hatinogullari tewrê panelî bîye.

Panelo ke moderatorîya ci Sereka BAFî Dîleke Incedal kerde Serekê AABKyî Huseyîn Mat û Wekîlê DEM Partî yê Îstanbulî  Celal Firat sey qiseykerdoxî tewrê ci bîyî. Badê rezgirewtişê semedê şehîdanê haştîye û demokrasîyî verî îdarekaranê dezgehanê ke panel organîze kerdo, qisey kerd.

Hemsereka Pêroyî ya DEM Partî Tulaye Hatinogullari qiseykerdişê xo de tewr zaf qala pêvînayîşanê bi Rayber Apoyî kerd.

Hatimogullari bi wesîleya Roja Ziwanê Dayîke bi erebkî bi ziwanê xo şar selam kerd  û nê vatî: ''Elewîyê ganê ma şima reyde qiseykerdişê haştîye muhîm o. Gananê elewîyan tarîxî ra nata zaf dejanê girdan rê şahîdîye kerde. Qirkerdişê girdî ameyî kerdene. Kerbela ra heta nika ma zaf ameyî qetilkerdene. Hetê bînî yê sînorî de bado ke îdare bedilîya vera gananê ma elewîyan qirkerdişî benê. Sûrîye de ganê ma yenê qetilkerdene. Ganî ma paştî bidê nê ganan xo û wayîrê înan bivejê.''

Hatimogullari bale muhîmîya pêvînayîşanê Îmraliyî ser û nê vatî: ''Birêz Abdullah Ocalan vano 'Eke Tirkîya û Îran mîyanê xo de demokrasîyî mîyarê caardene do hetê hêzanê emperyalîstan ra ziraro gird bivînê. Ez sey kesê ke cuyeya hempare pawena nêwazena wa wina bibo. Coka ez wazena wa no proses bi haştîye bêro çareserdene. Semedê çareserkerdişê meseleya kurdan sey verî ez wazenê bixebitî.' Ma zî sey Birêz Ocalanî fikiryenê.

Ma eşkerayîya tarîxî ya Îmraliyî peynîya sibete de ya zî sereyê adare de pawenê.  Senî ke ma qiseykerdişanê ci ra fam kenê Birêz Ocalan do eşkerayîye de qala çareserîya demokratîke ya meseleya kurdan bikero. Ocalanî pêvînayîşê xo yê diyîne de qetilkerdişê Narine Guran sey 'helisîyayîşê komelkî' pênas kerd. Xora waştişê ey bedilnayîşê komelî yo. Vano ganî komel mepawo qederê xo bi destê xo bibedilno. Pêvînayîşanê bi heyetê ma de Birêz Abdullah Ocalan zaf demokratîkbîyayîşî ser o vindeno. Çunke o bi xo nê pêvînayan bi dewlete keno. Vengdayîşî zî do o bikero. Vano muhîm o ke muxalefet mîyanê nê prosesî de ca bigîro.''

Hatimogullari derheqê tehqîqatê vera TUSÎAD,qeyûman û operasyonê sîyasîyî yê vera HDKyî de zî nê vatî: ''Ewro derbeya 12ê elule yena caardene. Birêz Abdullah Ocalan zereyê parantezî de vano ke  'Eke ma bieşkê parantezê 'teror'î biqefilne verê têkoşînê demokratîkî zî beno a.'  Eke meseleya kurdan bi rayîranê demokratîkan bêro çareserkerdene verê demokratîkbîyayîşê Tirkîya beno a.

Tirkîya de têkoşînê haştîye, azadî û seyyewbînî bi Mustafa Suphiyan dest pêkerd. Heta ewro ame. Têgêrayîşê Azadîye yê Kurdan nê rayîr de zaf bedelê giranî dayî.Bedelê çepê Tirkîya zî est ê.Ma wazenê nê prosesî înşa bikerê û biaçarnê haştîye.''