Dewleta tirke vera kultur, ziwan û hunerê kurdan polîtîkayanê asîmîlasyonî bêmabên ana ca. Bi taybetî wextê peyênî de qedexeyî bîyî zêde. Şîrketa Organîzasyonî ya Seyme 17ê kanûne de Merkezê Nawnayîşî yê Yahya Kemal Beyatliyî yê Kuçukçekmeceyî yê Îstanbulî de vera qedexe û tedayan do bi şîarê 'Ma do vajê' konserêkî bida.

Sere de Erdogan Emîr, Mehmet Atli û koma muzîkî ya îranije Rastak û Şahiya Stranan xeylêk hunermendî şewe de do vejîyê sehne ser. Konser de bi kirdkî, kurmancî û tirkî deyîrî do bêrê vatene. 

Perwerdekar û hunermendê Merkezê Kulturê Mezopotamya (MKM) Engîn Cengîz û Organîzasyonê Seyme ra Dîlane Suyu derheqê konserî de Ajansê Mezopotamya (MA) rê qisey kerd. 

 Engîn Cengîzî pare kerd ke hunermendê kurdî her hetî ra zehmetîye ancenê û binê teda de kenê ke hunerê xo bîyarê ca. Cengîzî ard ziwan ke komelê kurdan komelê zengînî yo. Cengîzî vat: ''Ma bi serran o vera hişmendîya qedexekerdişî ya dewlete têkoşîn kenê. Ewro dewlete hunermendanê kurdan û xebatanê înan asteng kena. Dewlete hunermendanê ke verê ci de sereyê xo nêanê war kena ke tasfîye bikera. Hedefê ci yo verên zî no yo ke ziwan û kulturê komelî wertî ra wedarno.''

Dîlane Suyu aktîvîteyê înan yenê qedexekerdene rixmê ney zî ê do vera nê kerdişan tim xo ver bidê. Dîlane vat: ''Deyîrê kurdkî ameyî vurnayene bi tirkî. Şahiya stranan vera nê kerdişan ronîyabî û heta nika 3 albumî vetî.''

Dîlane Suyu da zanayene ke 17ê kanûne de pêro ziwanî do konserê înan de bêrê yewca û venga pêro hemwelatîyan da ke seba ke wayîrê ziwan û kulturê xo vejîyê wa tewrê konserî bibê.