Serranê peyênan de seba muzîkê kirdkî eleqeyêko pîl esto. Hem goştarîkerî hem zî deyîrbazî verê xo hêdî hêdî danê muzîkê kirdkî. Hunermende Zaranca ke qezaya Pilemurîye ya Dêrsimî ra ya, bi nameyê 'Wayîrê Vengê Ma' albumêko newe vet.

Album de bi temamî 8 deyîrî estê û babeta albumî zî 'hesretê Dêrsimî' yo. Vatişê deyîran aîdê Alî Erenler û Aslan Kayayî yo û aranjmanê albumî zî Cengîz Aktaş o. Hunermende Zarance seba deyîranê '38 Ewro, Wayîrê Vengê Ma, Zerrê Ma de' klîbî zî girewtî.

Hunermende Zaranca ke pê veng û deyîranê xo ziwan, bawerî, kultur û xozaya Dêrsimî mojnena ra nika Almanya de ciwîyena. Zarance derheqê armancê albumî de nê çîyan vana: ''Hêverî ez armanc kena ke ziwanê xo yê kirdkî/kirmanckî yo ke ziwanê Xizirî yo, wayîrê ci vejîya. ''

Zarance kam a?

Hunermende Zarance dewa Gersunutî ya qezaya Pilemurîye ya Dêrsimî de dadîya xo ra bîya. Zarance Zanîngehê Îstanbulî de beşê jeofîzîkî de wend. Dima zî Zanîngehê Kielî yê Almanya de jeofîzîk ser o doktora kerd. Zarance wextêkê dergî ra nata muzîkî reyde eleqedar bena û perwerdeyê muzîkî gêna. Wayîrê Vengê Ma albumê ci yo verên o.