Komîteya Rayberdişî ya PKKyî eşkerayîya nuştekîye daye û nê pare kerdî:

''Ma serrgêra 37ine ya Qirkerdişê Helepçe yo ke 16ê adara 1988 de ame kerdene, reyna bi nefretî şermezar kenê û şehîdanê xo yê qirkerdişê Helepçe bi hurmet yad kenê. Ma veng danê heme kurdan ke wa çirey şehîdanê estbîyayîş û azadîye xo vîra mekerê, tim wayîrê înan bivejê û vîrameyîşê înan Kurdîstanê azadî de bidê ciwîyayene.

Newroza Rayber Apoyî rê azadîya fîzîkîye

Reyna Newroza 2025î çarçewaya hemleya newî de ya ke Rayber Apoyî bi 'Vengdayîşê Haştîye û Komelê Demokratîkî' daye destpêkerdene, sey 'Newroza Rayber Apoyî rê azadîya fîzîkîye' bi coşî yena pîrozkerdene. Senî ke Rayber Apoyî vat Newrozî bi PKKyî dahîna rind û bimana yenê ciwîyayene. Sere de cinî û ciwanî şarê ma û dostî her  ca de meydanan kenê pirr û bi waştişê azadîya fîzîkîye ya Rayber Apoyî Newroze pîroz kenê. 

Ma sere de Rayber Apo Roşanê Azadîye Newroze hemrayanê xo, gerîlayanê qehremanan, cinîyan, ciwanan, şar û dostanê xo rê pîroz kenê. Şexsê Kawayê Hemdemî Mazlûm Doganî de şehîdanê Newroze, heme şehîdanê xo yê qehremanan ke Newroze kerde Roşanê Azadîye yê Hemdemî bi hurmet, heskerdiş û mînetî yad kenê û veng danê şar û dostanê xo ke wa Newroza emserî de dahîna zaf azadîya fîzîkîye ya Rayber Apoyî biwazê.

Gamê pêtî û paştdayîşo konkret hewce keno

Seke yeno zanayene heyetê ke Rayber Apoyî reyde pêvînayîş kerd 27ê sibate de sey Manîfestoyê Demî vengdayîşo tarîxî kerd. Ma zî 1ê adare de cewab da nê vengdayîşî û seba ke verê pratîkî bêro akerdene, ma adirbirnayîş îlan kerd. Ma bi zanayîş û bawerî gamê pêtî eşt ê. Nika vengdayîşê tarîxî yê Rayber Apoyî û adirbirnayîşê ma 15 rojî xo dima verdayî. Xora ma bêsebir nîyê û zanê ke nê gureyê ke ma kenê cîdî û zor ê la wext zaf muhîm o û semedê serekwtişî gerek pîya gamê pêtî bêrê eştene û wext zî raşt bêro şuxulnayene. Herinda vatişê keyfweşî û temenî de gerek game pêtî bêrê eştene û paştdayîşo konkret bêro dayene.

Wa pêro çekî bêrê vindarnayene

Nê demê 15 rojan de hetê tay hetan ra adirbirnayîşê ma ame rexnekerdene û kêm ame vînayene. La heta ke çekê mevindê caverdê eştişê gamanê polîtîk û pratîkan, çew nêeşkeno  munaqeşeyanê raştan zî bikero. Nê semedî ra adirbirnayîşê ma gamêka muhîm a. Xora adirbirnayîş yewhet nêbeno. Semedê gamanê pratîkan gerek pêro çekî bêrê vindanayene. La caardişê îqtîdarê Tirkîya goreyê na rewşe nîyê. Hêrişê leşkerî yê artêşa tirke goreyê verî ra binena kêm bibî zî nê demê adirbirnayîşî de 73 reyî hêrişê teyarayan, 4175 reyî hêrişê top û obusan 8 reyî hêrişê bi çekê qedexeyî ameyî kerdene. Teyarayê çekdarî yê keşîfî tim gêrenê. Seba ke 27ê sibatî ra nata pêvînayîşê Îmraliyî nêbîyî ma nêzanê şertê Rayber Apoyî bedilîyayî ya nê.  Kenê hem hema sîstemê Îmraliyî sey verî bidomnê. Tay pêvînayîş û munaqeşeyî çapemenî de bivejê zî derheqê babete de xebeta meclîsî çîn ê.

Eşkerayîya ma ya 1ê adare vîyartbar a

Ma semedê Newroze têna seba zanayîş bidê şarî nînan vanê. Ma prosesî teqîp kenê. Badê Newroze do reyna erjnayîşî bibî û zelalîye vejîyo werte. Xora semedê ma her çî zelal o. Heta nika Rayber Abdullah Ocalanî ma rê mektubêk şawit ma cade cewabê ci da. Ma 1ê adare de cewab da vengdayîşê Rayber Abdullah Ocalanî yê 27ê sibate. Teberê nînan de Rayber Abdullah Ocalanî reyde tekîlîya ma çîn a. Derheqê kongre, çeke ronayîş û feskerdişê PKKyî de çîyê ke ma eşkerayîya xo ya 1ê adare de vatî vîyartbar ê. Çiwext û senî nê yenê kerdene derheqê înan de Rayber Abdullah Ocalanî ra ma rê zanayîşêk nêameyo.

Proses cîdîyet, hîsgêrî û sebir wazeno

Eşkera yo ke no proses cîdîyet, hîsgêrî û sebir wazeno. Reyna çarçewaya raşte de cehdkerdişo gird û têkoşîn hewce keno. No proses her kesî geno zereyê xo hewcedarî est a ke her kes xorexnekerdişê xo bido û semedê bedilnayîşî gerek gamê demokratîkî yê cîdî bêrê eştene. Ma wina  ewnîyenê na mesele ra û veng danê ke wa wina Demê Haştîye û Komelê Demokratîkî rê bêro nizdîbîyayene. Reyna cinî, ciwanî, şar û dostê ma zî sey hêzê bingeyî yê prosesî gerek hîsgêr têbigêrê û bi cehdkerdişê xo gamanê pratîkan bidê eştene. 8ê Adare bi destpêkerdişê nê. Şayîyanê Newroze de gerek bi vengê tewr berzî azadîya fîzîkîye ya Rayber Apoyî bêro waştene. Ma reyna Newroze pîroz kenê û veng danê ke Newroze wa sey çalakîyanê azadîya fîzîkîye ya Rayber Apoyî bêro pîrozkerdene!

Newroz pîroz be!

Bijî Rêber APO!''