Çalakîya verê OPCWyî de polîsan hêrişê ciwanan kerd

Bajarê Den Haagî yê Hollanda de verê Rêxistina Qedexekerdişê Çekan ê Kîmyewîyan (OPCW) de çalakîye ameye kerdene. Polîsan hêriş kerd bi desan ciwanî destbend kerdî.

Bajarê Den Haagî yê Hollanda de verê Rêxistina Qedexekerdişê Çekan ê Kîmyewîyan (OPCW) çalakîye ameye kerdene. Çalakîye de hêrişê pê çekanê kîmyewîyan ê dewleta tirke bêvengîya welatanê Ewropa ameyî şermezarkerdene. Polîsan hêriş kerd bi desan ciwanî destbend kerdî.

Nizdê 30 ciwananê ke waşt debikewê banê OPCWyî raştê hêrişê polîsan ameyî. Polîsan hêrişê ciwanan kerd û heme destbend kerdî. Verê berî de bi desan kesan çalakîye rê dewam kerde. Çalakwanan bale ante ser ke dewleta tirke Kurdîstan de çekanê kîmyewîyan şuxulnena û veng dezgehanê eleqedaran ê Ewropa ke şirê Tirkîya ser ke verê nê hêrişan bêro girewtene.

Çalakîye de bi eşkerayîyeke veng dîya dezgehanê mîyanneteweyîyan. Eşkerayîye de nê ameyî vatene: ''7 mengan ra nata dewleta tirke Başûrê Kurdîstanî de çekanê kîyewîyan şuxulnena. 23ê nîsane ya 2021î ra heta ewro teyarayê şerî yê dewleta tirke dewan, bajaran erazî ser o bombayan varnenê. Netîceya operasyonan de xeylêk daristan vêşa. Goreyê eşkerayîyanê  HPG û rojnamegeran û dezgehanê heqanê merdiman ê herême 300 rey ra zafêr hêrişê kîmyewî ameyî kerdene.  HPGyî pîya bi belgeyan eşkera kerd ke gazê sey Tabun, Kloropikrin Sulfur, Mustard û gazê ke hîşê merdiman vîn kenê şuxulnayî. Netîceya nê hêrişan de 37 gerîlayî şehîd bîyî û bi seyan sîvîlan zirar dî. Dezgehê mîyanneteweyî yê sey OPCW, Neteweyê Yewbîyayeyî vera nê hêrişan bêveng ê. Ganî heme hukmat û dezgehê eleqedarî yê mîyanneteweyî vera nê hêrişan vengê xo vejê. Ganî derheqê şuxulnayîşê çekanê kîmyewîyan de cigêrayîşî bêrê kerdene. Ma veng danê ke wa heyetêk Metîna, Zap û Avaşîn de cigêrayîş bikero.''