Mamosta û ziwannas Abdurrahman Bakiro ke bi serran o seba ziwanê kurdkî kar û xebatan keno derheqê polîtîkayanê asîmîlasyonî yê dewlete de Ajansê Mezopotamya rê qisey kerd. 

 Bakirî da zanayene ke wextê Osmanîyan ra nata kurdkî yena qedexekerdene û dewleta tirke zî seba ke wayîra ferasetê netewe-dewlete ya, ziwanê kudkî qedexe kena û çin hesibnena. Bakirî vat: ''Dewlete bi hawayêkê nijadperestî hêrişê kultur û ziwanê şarê kurdî kena. Dewlete bi destê xo qetî heqê perwerdeyê kurdkî yê fermîyî nêdana. Seba nê heqî ganî komelê ma xo rêxistin bikero û têkoşîn bikero. Ganî komel hetê sîyasî, kulturel, edebî, ekonomîk û tarîxî ra xo rêxistin bikero yanî dewlete ra çîyêkî mepawo.''

Bakirî pare kerd ke mîyanê komelî de wendiş û qiseykerdişê bi kurdkî kêm o û vat: ''Şarê ma ganî her ca de bi ziwanê xo qisey bikero. Wa her kes keyeyê xo bikero dibistana kurdkî. Eke ma wina têbigêrê ma  do ser bikewê. Bi taybetî ganî sîyasetmedarê ma karanê xo bi kurdkî bikerê. Ganî mesuldarê dezgeh û sazgehanê ma karanê xo bi kurdkî bikerê.  Eke karê winayênî bêrê kerdene ma game bi game do aver şorê.  Nê warî de zî ma rê têkoşînêko hempar lazim o.

Ziwanêk heta nêbo ziwanêko fermî û ziwanê perwerdeyî do çin bibo. Çunke ziwan organêko gandar o. Coka ganî hem warê sîyasîyî de hem zî warê dîplomasî de ziwanî ser o xebatî bêrê kerdene.''