Rêzefîlmo verên ê Rojawanî 'Tava Sor'a ke 16 beşan ra yeno pê, beşo ci yo verên Stêrk TV de weşanîya. Senaryoyê rêzefîlmî hetê Ehmed Tahîrî ra 2018 de nusîya, dîrektorîya xi Teymûr Evdikê, Nûman Yîgît û Deştî Resûl kenê. 

Fîlm de 35 kaykerdoxî û 500 fîguranî ca gênê. Rêzefîlm de qala prosesê xoverdayîşê xoîdarekerdişî yê Cizîre û xoverdayîşê hêzanê YPSyî yena kerdene. Rêzefîlm Dêrik, Girkê Legê, Qamişlo û Reqa de ame girewtene.

Dîrektor Nûman Yîgîtî derheqê Tava Sore de ANFyî rê qisey krd. Yîgîtî pare kerd ke Cizîre de merdimî bodruman de ameyî vêşnayene û dinya no qirkerdiş seyr kerd. Yîgîtî vat: ''Ehmed Tahîrî wextê proseesê nuştişê senaryoyî de nêweşîyêke ra dinyaya xo bedilnaye. Ey roman, hîkaye û şîîrî zî nuştêne. O têna senarîstê ma nê, heman wextî de kedkarêkê na xebata ma bi.''

Yîgîtî da zanayene ke wexto ke înan Dêrik de dest pê girewtişê fîlmî kerd, şarî zaf eleqe mojna ci û vat: ''Komun û meclîsanê Rojawanî paştî daye ma. Ercîyaye yo ke hîkayeyê Vakurê Kurdîstanî Rojawanî de bi rayîrê sînema yenê vatene. Xebatkarê fîlmî zî naye ra zaf kêfweş bîyî. Çar parçeyanê Kurdîstanî de raştîya şarê kurdî bi fîlmen yena vatene. Ma armanc kerd ke pê nê fîlmî raştîyan biresnê komelî.

Ma rêzefîlm de bi rayîrê hîkayeya keyeyêkê kurdî qala prosesê xoverdayîşê xoîdarekerdişî kenê. Ma qala ci kenê ke Cizîre de ciwanan senî dewlete û xayînan ra qesas girewt. Tava Sor de qerardarîya têkoşînî û serewedarnayoxîya kurdan yenê mojnayene. Tava Sor hîkayeya şarê kurdî ya.''