Wan de vizêr rêxistinanê komelê sîvîlî û partîyanê sîyasîyan pîya derheqê 15ê Gulane Roşanê Ziwanê Kurdkî de eşkerayîye daye û programê aktîvîteyan eşkera kerd. Heyata eşkerayîye de "Herdem Kurdî, her der Kurdî" ame dalignayene.

Eşkerayîye de bale ameye antene polîtîkaya asîmîlasyonî ser, semedê wayîrvejîyayîşê ziwanê kurdkî ame vengdayene û wina ame vatene: "Serdestî gama ke wazenê şarêkî orte ra wedarî, verî hêrişê ziwanê ci yê dayîke kenê. Ziwan estbîyayîş û nasnameyê şarêkî yo. Bi hêrişê vera kurdkî kenê ke kurdan orte ra wedarê. Vera polîtîkaya asîmîlasyonî têkoşînê kurdan dewam keno.

Ehmedê Xanî, Celaddet Elî Bedirxan û Baba Tahirê Ûryanî kurdkî emanatê şarê kurdî kerd. Ma zî do rêçê nê erjanê xo de ziwanê xo bipawê. "

Badê qiseykerdişî programê aktîvîteyanê 15ê Gulane Roşanê Ziwanê Kurdkî

yê Wanî ame eşkerakerdene:

"* 12ê Gulane: Miks de mezelê Feqiyê Teyranî do bêro zîyaretkerdene û eşkerayîya çapemenîye bêro dayene.

* 13ê Gulane: Parka Sanatî de serkêşîya cinîyan de eşkerayîya çapemenîye do bêra dayene.

* 13ê Gulane: Merkezê Kulturî yê Nûda de  şewa dengbejan do bêra organîzkerdene.

* 14ê Gulane: Dayîkê Haştîye do bêrê zîyaretkerdene.

* 14ê Gulane : ŞanoWan de belgeyê mezunîyetî do bidiyê wendekaranê  ARSİSA , aktîvîteya deyîre û şîîran do bêra organîzekerdene.

* 15ê Gulane : Parka Feqiyê Teyranî de serkêşîya cinîyan eşkerayîye û rayraşîyayîş do bêro kerdene.

* 15ê Gulane: BASK-DER de şayîya ciwanan do bêro kerdene.

* 16ê Gulane: Merkezê Kulturî yê Nûda şayîye do bêra kerdene.

* 19ê Gulane: ARSİSA de aktîvîteya qiseykerdiş û îmza ya nuştox Sîdar Jîrî. "

* 25ê Gulane: Erdîş de mîtîng do bêro kerdene.