Wekîla HPD’yî ya Amedî Dersim Dage û panc endamanê partîye seba ke reaksîyon bidê bêvêngîya hukmatî ya grevanê vêşanîye, yê ke semedê wedartişê tecrîdê serê Ocalanî yenî viraştene, dest bi grevê vêşanîye kerdbi.  Polîsan  eşt banê HDP’yî yê Amedî ser û çalakwanî destbend kerdî.

Saetanê nîmrojî de HDP’yî bi eşkerayîyêk dabi zanayene ke wekîle Dersim Dage û endamê partîye Bîlal Ozger, Îsmet Yildiz, Salîh Canseven, Salî Tekîn û Sevîcan Yaşare ewro Amed de dest bi grevê vêşanîye yê bêdem û bêagêrayîşî kerdo. Badê eşkerayîye banê HDP’yî gerîya binê ablûka. Polîsan dima ra eşt cayê çalakwanan ser û dest na pankartanê înan ser a û çalakwanî Bîlal Ozger, Îsmet Yildiz, Salîh Canseven, Salî Tekîn û Sevîcan Yaşare  destbend kerdî. Çalakwanan ra Sevîcan Yaşare wextê destbedkerdişî de hetê polîsan ra ameye derbkerdene. Parlamenter Dage banê HDP’yî de çalakwanê bînî zî binê nezaretî de çalakîya xo rê dewam kenî. Dage hêrişê polîsan ra dima hesabê xo yê medyaya sosyale ra mesajêk pare kerd û vat: ‘‘Qet yew zext nêeşkeno vernîya xoverdayîşê ma bîgêro. Ma do ser bikewê, miheqeq ser bikewê.‘‘