Vakurê Kurdîstanî û Tirkîya de kedkarî binê versîya şer, krîzê ekonomîkî û feqîrîye de amadekarîya pirozkerdişê 1ê Gulane kenê.

Hemserekê Sendîkaya Kedkaranê Weşîye û Xizmetanê Komelkîyan (SES) ya Colemêrgî Remzî Ozerî  ard ziwan ke Colemêrg de qanûnê halê îstîsnayî yenê caardene û vat walîyî semedê pîrozkerdişê 1ê Gulane warê otogarî ke teberê bajarî de yo nîşan dayo. Ozerî vat: ''Ma semedê ca û saetê aktîvîteya 1ê Gulane Walîtîye û dezgehanê eleqedaran ê bînan de pêvînayîşî kerd û înan rê vat ma wazenê ça aktîvîte bikerê la înan yew cayo ke senî teberê bajarî bo mojna. Na neheqîye bi serran o yena kerdene. 1ê Gulane ke şarî ra qerifnaye yeno kerdene, qet manaya ci çîn a. Ma na rewşe şermezar kenê. Îqtîdar keno şarî bi vêşanîye terbîye bikero la o do rojêke miheqeq hesabê nê bido.''

Rojnameger Salih Sertkalî zî ard ziwan ke sey kedkaranê bînan Tirkîya de şertê rojnamegerîye zî zehmet bîyî û vat: ''Her roje hûmara rojnamegeranê bêkaran zedêr bena. Pîya bi zextanê dewlete şertê xebatî zî zor bîyî.  Rojnamegerîye zî miyan keranê ke heqê keda xo nêgenê de ya. Rixmê polîtîya çokdayîşî, rojnamegerê ke hetê heq û mazlûman de yê vera zextan milê xo çewt nêkenê est ê. Roja înan a 1ê Gulane pîroz bo.''

Mamosteyê tarîxî Adem Demiro ke 10 serrî yo tayînê xo paweno û mamosteyîya biyewmîye keno sere de Wan xeylêk bajaran de xebityayo. Demirî vat: ''1ê Gulane de sere de mamosteyê ke nînê tayînkerdene ganî heme karker û kedkarî bibê yew.  Ma kedkarî bi serran o tengayî ancenê. Ma kede danê le vera ci heqê xo nêgenê. Vera nê sîstemî ganî kedkarî 1ê Gulane de waran de bê. Eke ma bibê yew, ma eşkenê nê sîstemî birijnê.''