1ê Gulane Roşanê Karkeran şaristananê Vakurê Kurdîstanî û Tirkîya de ame fîrazkerdene. Bi hezaran karker û kedkaran meydanî kerdî de û polîtîkayê şerî protesto kerdî.

Amed

Amed de 1ê Gulane serkêşîya Konfederasyonê Sendîkayanê Kedkaranê Umûmîye (KESK), Platformê Şubeyan ê Dîyarbekîrî, Temsîlkarîya Konfederasyonê Sendîkayanê Karkeran ê Şorişgêran (DÎSK) û Yewîya Odayanê Muhendîs û Mîmaran (TMMOB) de, bi şîarê 'Ma do pîya bivurnê' Meydanê Îstasyonî de ame fîrazkerdene.

Serekê Komîteya Amadekare Kamuran Taşî, Endama Heyetê Rayberdişê Merkezî uê KESKî Gonule Kural Konseya Merkezî ya TTByî ra Halîs Yerlîkayayî mîtîng de qisey kerd û ard ziwan ke karkeran rê sîstemo kolonyal yeno ferzkerdene la seke kede yê înan a, vate zî ê înan o.

Wekîla HDPyî ya Amedî Dêrsime Dag zî mîtîng de wina vat: ''Serra 2022yî bîya serra karkeran. Karkerî vera polîtîkayanê îqtîdarî waran de yê. Îqtîdarî polîtîkayanê xo şerî ser o nano ro. Wexto ke Îmrali de tecrîd beno giranêr polîtîkayê şerî zî kewenê dewre. Îqtîdar narey Başûr de hêrişê kurdan keno. Ganî PDK nêkewo dafika AKPyî. Kurdî do meverdê ke no şero gemarin ser bikewo.''

Mîtîng pê deyîran qedîya.

Dêrsim

 

Dêrsim de Meydanê Seyîd Rizayî de serkêşîya Platformê Kede û Demokrasî, DÎSK, Egitim Sen, HDP û rêxistinanê bînan de 1ê Gulane ame fîrazkerdene. Wekîlê HDPyî yê Dêrsimî Alîcan Onluyî mîtîng de qisey kerd û da zanayene ke îqtîdarî vera kede, demokrasî, nan û Başûrê Kurdîstanî şer keno û ê do vera nê sîstemê talan û îşxalî têkoşînê xo rê dewam bikerê.

Îstanbul

Îstanbul de serkêşîya Konfederasyonê Sendîkayanê Kedkaranê Umûmîye (KESK), Yewîya Doktoranê Didanan (TDB), Yewîya Tabîban ê Tirkan (TTB) Konfederasyonê Sendîkayanê Karkeran ê Şorişgêran (DÎSK) û Yewîya Odayanê Muhendîs û Mîmaran (TMMOB) de, bi şîarê 'Ma do pîya ser bikewê' Meydanê Maltepe de ame fîrazkerdene.

Meydanê Maltepe de xeylêk karkerî tewrê mîtîngî bîyî. Mayê Haştîye zî bi kincanê neteweyîyan û sloganê sey 'Îmraliyî rê hezar selamî' kewtî meydan. Girseyan meydan de govende girewte û deyîrî vatî.

Mîtîng de Sereka DÎSKî Arzu Çerkezoglu, Serokê KESKî Mehmet Bozgeyîk, Seroka TTByî Şebnem Korur Fîncanci, Serekê TMMOByî Emîn Koramaz û Serokê TDByî Kadîr Tumay Îmre pîya vejîyayî sehne ser û girse selam kerd. 

Çerkezogluye ard ziwan ke ê do pîya sîstemê bêedaletî bivurnê, ameyoxê welatî roşnî bikerê. Bozgeyîkî îfade kerd ke îqtîdarê AKP-MHPyî bacanê şarî dano şerî û meseleya kurdan bêçare verdeno. Emîn Korkmazî Şebneme Korur Fîncanci da zanayene ke ê îqtîdarî ra nêtersenê û vera şer, bêedaletî, zulm û xizanîye yê, haştîye bîyarê welatî.

Qiseykerdişan ra dima metno hempar ame wendene. Metn de bale ame antene krîzê şerî, rewşa zîndanan ser û wina ame vatene: ''Ma vera şer û dişmenîye vejîyê. No sîstemo xerab, sîstemê ma de çin o.''

Mîtîng pê deyîranê Kardeş Turkuler û govendan qedîya.

Wan

Wan de mîtîngê 1ê Gulane bi coşî qedîya. Mîtîng de Endamê Heyetê Rayberdişê Merkezî yê KESKî Şenol Koksal û Wekîlê HDPyî yê Wanî Sezaî Temellîyî qisey kerd.

Koksalî dîyar kerd ke ê do komelêkê laîk û demokratîkî awan bikerê û pîya sîstemî bivurnê. Temellîyî zî îfade kerd ke bale ante ser ke mîyanê nê sîstemî de tewr zaf heqê kurdan yeno werdene û vat: ''No sîstem sîstemê şerî yo. Ma do pîya ey bivurnê. Ma do tecrîdî bişiknê û birêz Ocalanî azad bikerê.''

Şirnex

Şirnex de bînaya HDPyî de 1ê Gulane ame fîrazkerdene. Wekîlê HDPyî Hasan Ozguneşî mîtîng de qisey kerd û vist vîrî ke îqtîdar hêrişê Rojawan û Başûrî keno. Ozguneşî îfade kerd ke seba azadîye û demokrasî tim ê do têkoşîn bikerê. Girseyî waşt govendan bigêro la polîsan destûr nêda girseyî. Girseyî rixmê astengîyan zî govende girewte.