Fatma Ozdemîra 66 serre dewa Çetîkî ya qezaya Pîranî ya Amedî ra ya û semedo ke 1994 de dewa înan ameya vêşnayene koçê Amedî kerd. Fatma Ozdemîr 25 serrî yo Baxçeyanê Hewsêlî de pelpar, tere û vaşanê bînan arê dana û pê rotişê înan debara xo kena.

Fatma her roje şewdir saeta 5 de keyeyî ra vejîyena û Hewsêl de 2-3 saetan gêrena, vaşanê xo arê dana û dima nînan kena pakî. Fatma dima verê xo dana Sûrî û nînan roşena. 

Fatma 3 baqê vaşan pê 10 TL roşena. Fatma vat: ''Ez heta saeta newî vaşanê xo roşena. Zabitayî tim belaya xo danê mi ro. Na serre de hende bare zehmet a. Ker çî bîyo vay. Ma zî xîret kenê ke heqê nanê xo bivisnê destî. Di mengî yo ez meaşê kokimîye gêna la keyeyê mi kîra yo, debare zehmet bîya.''