3 gerîlayê ke 8ê gulane de Bagok de pêkewtişêk de şehîd bibî Qoser û Nisêbîn de ameyî definkerdene. Polîsan nêverda ke keyeyî cenazayanê xo goristanê xo de defin bikerê, bişuwê û nimajê cenaza bêro kerdene.
8ê gulane de dewa Badibê ya koyê Bagokî ya Nisêbînî de operasyonêkê artêşa tirke de 3 gerîlayê HPGyî şehîd bibî. Ame tesbîtkerdene ke cenazayî aîdê Ramazan Aslan (Bager), Bayram Kuzu (Bager Qoser) û Mazlum Kizil ê.
Keyeyan vizêr şan Nêweşxaneyê Dewlete yê Mêrdînî ra cenazayê xo girewtî. Semedo ke wesayîtê cenaza nêdîya keyeyan ambulanso taybet kîra kerd. Cenazaya Ramazan Aslanî Goristanê Mohrîsî yê Nisêbînî de ameye definkerdene. Polîsan goristan girewt binê ablûqa û nêverda ke keyeyî ra ber çew tewrê definkerdişî bibo. Polîsan nêverda keye Goristanê Hecace de defin bikero, cenaza bişuwo û nimajê cenaza bikero.
Cenazaya Bayram Kuzuyî zî Goristanê Keyeyanê Kume yê Qoserî de ameye definkerdene. Polîsan nêverda ke nimajê cenaza camî de bêro kerdene, cenaza bêra şitene. Keyeyî cenaza serê gorî de kefen kerde.
Heman kerdişê polîsan cenazaya Mazlum Kizilî de zî ameyî kerdene. Cenazaya Kizilî goristanê dewa Girêbîr/Dûbîrka de ameye definkerdene. Keyeyê Kizilî de astengkerdişan ra serê gorî de cenaza kefen kerde.
