Namzedê HDP'yî yê Hemşaredarîya Pasûrî Fatma Ay û Mehmet Emîn Ayî, xebatê xo yê seba weçînitişî zêde kerdî û nika zî keye bi keyeyî, taxe bi taxe gêrenê. Namzedan ard ziwan ke 31'ê Adare biba roja rijayîşê rejîmê qeyûman.

FATMA AYE KAM A?

Fatma Aye serra 1984 de dewa Hewre ya qezaya Pasûrî ya Amedî de ameya dinya. Wendegeho verên Hewre de,  wendegeho mîyanên û lîse Amed de wendo û bado zî Unîversîteya Dîcle de beşê Ekonomî ra mezun bîya.  Pasûrî de 5 serrî karê deştişî kerdo û 7 serrî zî karê tûrîzmî kerdo. Tewr peynî de Kooperatîfa Cinîyan a Baglarî de ca girewt. Kênayêk aye esta.

Ê DO SINDOQAN RA HÊRSÊ ŞARÎ BIVEJÊ

Namzede Fatma Aye da zanayene ke seba şaredarîye îdîaya înan gird a û bale ante serê nêrazîbîyayîşê  qeyûman. Aye destnîşan kerd ke, ê do sindoqan ra hêrsê şarî bivejê û wina vat, “Îdarekarê ke şarî ê nêweçînitê îdarekar nîyê. Cara îdareyêko şefaf nêvirazîyayo. Ma do reyêna bi hawayêkê xurtî wayîrê emanetê şarî bivejîyê. Bê cîyakarîkerdişî, her beşê cimatî wextê qerardayîşî de wayîrê qiseyanê heqanê xo bo û şar bi şaredarîyan do xo îdarê bikero. Qeyûm wexto ke na ra serê şaredarîyan, karê ci yo destpêk padayîşê sazgeyê cinîyan bi. Bi nê waşt ke cinîyan û ciwanan bitersno. Bi nê hewayî vejîya werte ke polîtîka û ferasetê qeyûman, parçêkê ferasetê camêrdan o.”

HEQÊ WEÇÎNITIŞÎ AME XESPKERDENE

Namzed Mehmet Emîn Ayî zî destnîşan kerd ke bi tayînkerdişê qeyûman heqê weçînitişê şarî ameyo xespkerdene û na yewe sey derbeya vera demokrasîyî name kerde. Ayî ard ziwan ke şar naye qebul nêkeno û wina vat, “Wexto ke ma rî bi rî hemwelatijan de pêvînayîşan virazenê, merdim waştişanê xo û persanê xo vano. Ma zî seba çareserkerdişî nê persan perspektîf û projeyan amade kenê. Ma tim bi berpirsîyarîya ke ma do nê waştişan bîyarê ca cehd kenê. Wa 31’ê Adare biba roja peynîamaeyîşê îşxalkaran û a roje dêsê mabênê şarî û şarederîyan do bêrê wedaritene.”

MEHMET EMÎN AY KAM O?

Mehmet Emîn Ay serra 1970'î  de dewa Xerzika ya qezaya Pasûrî ya Amedî de ameyo dinya. Wendegeho verên, mîyanên Xerzika de wendo. Lîse zî Muş de wenda. Ayî şarê Xerzika reyde perwerdeyê Qûranî dîyo û reyna Medrese de zî perwerdeyê xo dewam keno. Ay serra 2009’î de operasyonê bi nameyê KCK’î de ame girewtene û serra 2015’î  de zî ame verdayene. Ay zewajîyaye yo û 7 domanê ci estê.

PROJEYO MUHÎM

Ayî pare kerd ke her ke şino persê qezaye zêde benê, labelê seba nê persan projeyê înan estê. Ayî da zanayene ke qezaye de persê awanîyê binerd û sererd û resîyî estê û wina vat, “Potansîyelê ciwanan û cinîyan qeza de zêde yo. Seba ke nufusê ciwanan zêde yo, ma do cehd bikerê ke şaredarîyêka cimatkîye virazîyo û çalakîyê kulturkî tede bêrê kerdene. Ma persan tespît kenê û seba çareserkerdişê înan projeyan amede kenê. Ma do heme şaredarîyanê xo binê îşxalkerdişî ra bixelesnê û seba xizmetê şarê xo a bikerê.”