Kurdîstan de her taxe û dewe de adirê Newroze yeno tavistene û dormeyê adirî de govende yeno girewtene.

Şingal

Xeylêk merkezanê Şingalî de adirê Newroze ame tavistene. Xanesor de ciwanan govende girewte. Endamê Meclîsê Şarî yê Xanesorî Hecî Kulî Newroza Rayberê Şarê Kurdî Abdullah Ocalanî û pêro kurdan fîraz kerde. Hemwelatîyanê bajarekê Guhbelî zî adirê Newroze vist ta û sloganê sey "Bê Serok jiyan nabe" û "Bijî Serok Apo" vatî. Şarî heta şewe govende girewte.

Kobanê ra heta Dêrikî

Şaristanan û dewanê Rojawanî de zî şarî şayîyanê ewroyînan ra ver meydanan de adir vist ta û dormeyê adirî de govende girewte.

Amed

Platformê Paştdayîş û Pawitişî yê Amedî Sûr de resepsîyonê Newroze serûber kerd. Resepsîyon de bi wesîleya Newroze eşkerayîyêke dîyaye. Eşkerayîya bi kirdkî hetê Serekê Odaya Bazirganîye û Sanayî ya Amedî Mehmet Kayayî ra ameye wendene. Eşkerayîye de bale ameye antene prosesê çareserîye yê 2013î ser û ame vatene ke kurdî şer nêwazenê û haştîye de israr kenê. Eşkerayîye de dîya zanayene ke kurdî do tim erjanê xo bipawê û Newroze fîraz bikerê.

Agirî

Taxa Cezaevî ya Agirî de adirê Newroze ame tavistene. Şayîye de venga her kesî dîya ke 25ê adare de tewrê şayîya merkezî ya Agirî bibo. Namzedanê Şaredarîya Agirî yê DEM Partî Hazale Aras û Mehmet Akkuşî tîya de qisey kerd û îfade kerd ke ê do weçînayîşan de ser bikewê.