Wekîlê DEM Partî yê Şirnexî Mehmet Zekî Îrmezî xespkerdişê îradeyê Wanî ANFyî rê ecna.

Îrmezî pare kerd ke netîceya ke Wan de bi xoverdayîşî ameya destvistene cesaretê şarê kurdî û sîyasetê kurdan o.

Îrmezî vat: ''Ma xo ver da û ser kewtî. Şarê ma xoverdayîşêko meşrû kerd. Pêro dezgeh û rêistinanê sîyasîyan zî nê prosesî de tewirêko raşt mojna. Seba ke demokrasî bêro welatî ganî her kes verê xo bido Kurdîstanî. Îqtîdarê AKP-MHPyî her weçînayîşî de muracatê rayîranê antîdemokratîkan keno û dewlete pêro dezgehanê xo vera ma şuxilnena. Rixmê ney zî narey îradeyê şarê ma ser kewt. Mumkîn nîyo ke îradeyê nê şarî bêro astengkerdene. Şarê ma di rojan ra nata seba ke îradeyê xo apey bigêro meydanan de bi. 

Xora no kerdişê îqtîdarî ceribnayîşêko cidî bi. Ez vana qey cewabê Wanî do verê senaryoyanê bînan ê serê Kurdîstanî zî bigêro. Ma ancî dî ke îradeyê nê şarî nêno binvistene. Hetê muxalefetê komelkîyî ra zî girîng bi ke wextê raştî de cayê raştî de bêro vindertene. No seba her kesî îmtîhanêko pîl bi.''