Çewlîg de  sey xeylî  bajaranê bînan ê Kurdistanî  polîsan seba vernî girewtişê rayraşîyeyîşê Amedî yo ke semedê paştîdayîşê Leyla Guvena ke 99 rojî yo semedê wedartişê tecrîdê serê Rayberê Şarê Kurdî grevê vêşanîye yê bêdem-bêagêrayîşî de ya,  yeno viraştene, banê HDP’yî girewt binê abluka.

Parlamenterê HDP’yî yê Çewlîgî Erdal Aydemîr û parlamenterê Mûşî Mansûr Işik û Şevîn Coşkune ke polîsan destur nêdayêne banê partî ra vejî teber, reaksîyon da polîsan, ablûkayê polîsan vêrtî û heta Kuçeyê Gençî rayra şîyê û tîya veng da vengê Leyla Guvene.

Erdal Aydemîrî vat ke seba ke Leyla biciwîyo çi ke destê înan ra bêro ê do bikerî û pest pa: ‘‘Ma semedê paştîdayîşê Guvene do heme îmkanan bişuxulnê. Ma zaf hol zanê ke eke tecrîd bêro wedartene, Leyla ciwîyena û vernîya mergan yena girewtene. Aşitî û edalet yenî no welat.‘‘

Parlamenteran ke ablûkaya polîsan şikite, dima ra verê xo da Amedî. Dormeyê banê HDP’yî de ablûka dewam kena.