Wextanê peyênan de vera goranê gerîlayan hêrişî zêdîyayî. Çewlîg de goranê Sevda Serînyel û Engîn Kîşînî ra dima na reye zî vera gorê Ekîn Morsumbulî hêriş ame kerdene. Cinîya Ekîn Morsumbulî Lutfîye Morsumbul dej û kederê xo pare kerdî û îfade kerd ke bawerîyêk yan zî exlaqêk de cayê nê hêrişî çin o.

Lutfîye Morsumbula ke Ewropa de kêna û tornê/a xo reyde ciwîyena di reyî testê ci yê vîrusê Korona pozîtîf vejîya. Coka nika binê karantîna de keyeyêk de têna ciwîyena. Lutfîye Morsumbul a ke hêrişê vera gorê Ekîn Morsumbulî 3 rojî verê cû wistewreyê xo ra musaya qala hêrişî wina kerd: ''Leşkeran pê telefonî vistewreyê mi ra waşt ke fotograf û nuşteyê gorî pê boyaxê sîya bêrê qefilnayene. Westewreyê mi zî înan rê vat ke o ho Îstanbul de yo. La leşkerî vano ke wa merdimê ma bêrê. Dezayê ma şino û leşkerî tira vanê ke qod, îşlîgê leşkerî û fotografê kerraya gorî pê boyaxê sîya bêrê qefilnayen. Dezayê ma ney qebul nêkeno û leşkerî pê boyaxê sîya gorê Ekînî texrîb kenê.

Nê mergêkî ra qesasê çita gênê aqilê çewî pê nêgêno. Seba ke dejê ma reyna abikerê wina hêriş kenê. Wazenê ke merdimê ke fikr û hîsanê xo ra fek vera nêdanê wina hetê manewîyî ra qels bikerê. Ê ser kewtî zî, no serebût mi rê zaf tesîr kerd. Ez nêzanena kênaya xo rê senî qala nê hêrişî kena. Ez seba pêro keyeyan zaf xemgin a. Çita destê mi ra bêro ez do seba înna bikera. Ez venga dezgeh û sazgehanê heqanê merdiman û her keso ke xo rê vanê merdim danê ke veng bidê nê qîrayîşê ma. Destê xo goranê ma ra biancê. ''

Lutfîye Morsumbul seba ke hêrişê vera mêrdeyê ci pêro rayaumûmîye rê bida zanayene no mesaj da: ''Îqtîdaro faşîst reyna prosesê vîrusê Korona de zî hêrişanê xo yê vera kurdan dewam keno. Hêrişê goran kenê, kerrayanê goran şiknenê. Ê merganê ma ra zî tersenê. Ma wayîrê erjanê xo vejîyayî û ma do bivejîyê. Na hîşmendîye armanc kena ke pê hêrişanê erjanê ma, ma qels bikera.

Ez pêro keyeyan ra ke gorê înan texrîb bîyî uzrê xo wazena. Ganî ma yew bibê û vera nê hêrişan bivejîyê. Ez hêvî kena ke huqûqo mîyanneteweyî vera nê hêrişan têgêreno! Ez pêro merdimanê hîsgeran dawetê wezîfeyî kena. Qebulkerdişê hende dejan zor o!''