Rojanê peyênan de Kurdîstan de vera goranê gerîlayan hêriş yeno zêdînayene. Dewa Cafranî ya Çewlîgî de zî kerraya gorê gerîlayê HPGyî  Engîn Kîşînî hetê leşkeran û natoran ra şikîyaye.

Hewteyê vîyarteyî leşkeran venga dewijan da ke wa nuşteyê kerraya gorî ya kirdkî ''Çila zerrîya ma, lîlika çimanê ma'' biaçarnê tirkî. Dima ke dewijî şîyî, leşkeran û natoran kerrayê kerraya gorî şiknaye.

Dadî Hamşîye Kîşîn wexto ke merkezê şaristanî ra agêraye û şîye goran ser, pê mesele hesîyaye. Dadîye Kîşîne verê gorî de lawikî vatî û vera leşkeran û natoran nêrazîbîyayîşê xo mojna û vat: ''Êyê ke gorê ro vist nê halî wa dest û lingê ci bişikîyê, çimê ci kor bibê. Na bêweijdanî û bêîmanî ya. Se kenê wa bikerê nêeşkenê rûmet û şanê domananê ma çin bikerê. Ma reyna seba înan dûa bikerê, qurbanan bidê û loqmayan vila bikerê. Nê goranê domananê ma ra çi wazenê?''