Yeno waştene ke serê erazîyê dewanê Arex, Cevîzlî, Aysakli, Îlbey, Maltepe, Mirzîkan, Mexsîkan, Suznut, Kusmur, Şorîk û Birîkanî yê qezayanê Gêxî û Azarpêrtî de warê 464 hezar hektarî de madenê çînko-sim-erjîjî bêro akerdene. ÇEDî rixmê nêrazîbîyayîşanê şar û rêxistinanê herême zî seba madenî raporo pozîtîf da Şîrketa Bîngol Metal-Madencîlîkî. 

Vizêr Gelîya Pêrî ya qezaya Gêxî ya Çewlîgî de serkêşîya Platformê Xoza yê Gelîya Pêrî de, bi beşdarîya Odaya Muhendîsan, Baroyê Çewlîgî, BÎNÇEV-DER, Komeleya 'Seba Dara Hêni Yew Saete', HDP, KAYY-DERî, Wekîlê HDPyî yê Çewlîgî Erdal Aydemîr,  Vervatoxê Xîretê Pawitişê Mîrasê Xozayî û Kulturelî yê Dêrsimî û Avûkat Bariş Yildirim û xeylêk hemwelatîyan projeyê madenî bi eşkerayîyêke ame protestokerdene.

Cendirmeyan noqtaya nêzdîyê projeyê madenî de beşdaranê çalakîye rê cigêrayîşê nasnameyan fer kerd.

Eşkerayîye de Bariş Yildirimî derheqê projeyî de agahîye daye şarî û da zanayene ke Çewlîg de reya verêne seba xoza çalakîyêka hende pîle yena kerdene.

Wekîlê HDPyî yê Çewlîgî zî şarê Çewlîgî rê sipas kerd û îfade kerd ke ê sey HDPyî tim hetê şarê Çewlîgî û xozaya Çewlîgî de yê.

Çalakîye de vera şarî sloganê sey 'Bi xoverdayîşî ma do ser bikewê', 'Wayîrê madenî nê, wayîrê Pêrî vejîyê' vatî.

Dima eşkerayîye ameye wendene. Eşkerayîye de ame parekerdene ke raporê ÇEDî raştîyan çewt keno, goreyê huqûqî nîyo. Eşkerayîye de ame vatene ke no projeyê madenî do zerarêkê pîlî bido xozaya Çewlîgî û ganî ÇED raporê xo betal bikero.

Eşkerayîye ra dima temsîlkaranê rêxistin û komeleyan zî qisey kerd. Înan zî bale ante zeraranê projeyî ser û waşt ke proje cade bêro betalkerdene.

Qiseykerdişan ra dima şarî govende girewte.