Çewlîg de Newroze reya verêne 1991 de ameye pîrozkerdene, semedê polîtîkayanê dewlete ra bajar de pîrozkerdişê girseyî çar serrî nêameyî kerdene. Bajar de seba Newroz a ke 21’ê Adare de do bêro pîrozkerdene xebatêka pête yena kerdene. Hemserekê HDP’yî yê bajarê Çewlîgî û Serekê Komîteya Amadekarîya Newroze Zeynel Kayayî ard ziwan ke, 1991’î ra nata pîrozkerdişê Newroze bicoş û bi ruhê şorişî yenê viraştene.
WAREYÊ NEWROZE DI REYÎ AME BEDILNAYENE
Kayayî ard vîrî ke, Çewlîg de Newroze reya verêne 1991 de bi tewrbîyayîşê girseyanê girdan ameye pîrozkerdene û vat, “1993 ra dima nêzdîyê 4 serrî ma nêeşkayî pîrozkerdişê Newroze bivirazê. Bado ma reyna dest kerd ci û pîrozkerdişî viraştî. Zereyê çend serran de wareyê pîrozkerdişê Newroze şeş reyî ameyî bedilnayene. Nê hîrê serranê peyênan de ma Rayîro Sereke yê Saglikî de pîrozkerdişanê xo virazenê.”
WALÎTÎYE RA HÎNA DESTÛRO FERMÎ ÇIN O
Kayayî ard ziwan ke înan broşurê ke seba Newroze kerdê amade vila kerdê û hetê bînî ra xebatanê weçînayîşî reyde bi anonsan hemwelatijan dawetê Newroze kenê û vat, înan seba ke ca û saet a ke do Newroze bêra pîrozkerdene muracatê walîtîye kerdo.
MA DO PEYAMÊ HEŞARBÎYAYÎŞÎ BIDÊ
Kayayî ard vîrî, ê pîrozkerdişanê Newroze de tim peyamanê haştîye danê û vat, “Newoze sembolê têkoşînê Kawayî yo ke vera Dehaqî dayo. Ma zî Newroze sey xelisîyayîşê şaran vînenê. Ma do peyamê şaranê bindestan ê ke sere ronênanê û heşarbîyayîş bidê.”