Fermandaranê Merkezê Pawitişê Şarî (MPŞ) ra Zozane Çewlîk çalakîya fedayî ya Anqara ya 1ê teşrîna verêne, xoverdayîşê gerîlayan û hêrişanê dewleta tirke ya îşxalkere ANFyî rê ercnayî.

Qiseykerdişê Zozane Çewlîk ra tay noqtayê girîngî wina yê:

''1ê teşrîna verêne de embazanê ma Rojhatî û Erdalî Anqara de çalakîyêka stratejîke kerde. Bi nê hawayî startê serebûtanê girîngan dîya. Xora Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' zî na menge dîyaye destpêkerdene.  Çalakîya 1ê teşrîna verêne hetê mesajanê xo ra manena çalakîya fedayî ya embaze Zîlane. Bi çalakîya Anqara prosesê hemleya şiknayîşê tecrîdî, azadkerdişê şarê ma ya gerîlayan ame selamkerdene. 

Wa bizanîyo ke çalakîyê bi nê ruhê fedayîyî hînî do tim bêrê kerdene. Embaze Zîlane reyde çalakîya fedayîye bîye terzê ma yo esas û radîkal. Têgêrayîşê ma têgêrayîşê fedayîyan o û mumkîn nîyo ke têgêrayîşêko winayên bêro çinkerdene. Çalakîya Anqara de dewlete, selahîyetdarê ci, wezîrê ci, îstîxbaratê ci ûsn nêeşkayê nameyanê embazanê ma zî tesbît bikerê. 

7ê teşrîna verêne de Hamasî hêrişê Îsraîlî kerd. 7ê teşrîna verêne ra dima dinya de çîyêk do sey verî nêbo. Dinya û Rojhelato Mîyanên newe ra yenê dîzaynkerdene. Kerdişê Hamasî û hêzanê emperyalîstan nêeşkenê serê dewaya heqdare ya şarê Filîstînî bigêrê. Erdogan meseleya Filîstînî de dirîtîye keno. Dewleta tirke sey Îsraîlî hêrişê Rojawanî kena. Qederê kurd û ereban yew o, coka nê şarî vera îşxalkeran yew bibê.

Herêmanê Pawitişî yê Medya de şerêko giran est o. 20ê temmuze de vera Herêma Şehîd Delîlî ya Rojawanê Zapî hêrişê neweyî dîyayî destpêkerdene. La vera hêrişan gerîlayî xoverdayîşêkê bêhempayî kenê. Gerîlayan şer de xo aver berd. Gerîlayan serkêşîya YJA-Starî de vera dişmenî çalakîyê serkewteyî kerdî, derbê giranî dayî dişmenî ro. Dişmen rixmê teknîk, teknolojî û çekanê xo zî nêeşka netîceyêk bivisno destî. Dişmen Zap de verê çalakîyanê hêzanê ma de bêçare mend. Operasyonê Pençe-Kilîdî yê Zapî de dişmenî narey erk da Tumgeneral Emre Tayançî. Tayançî zî xîret kerd ke hêzanê dewlete bişawo tunelanê şerî. La reyna no xîretê înan bin kewt. Wina aseno ke Tayanç seba ke xo îsbat bikero metodanê cîyayan û gêjonîyan bişuxilno. Tayanço ke hetê dişmenî ra sey xelisnayoxî yeno mojnayene, sey ê bînan mehkumê binkewtişî yo.

Artêşa tirke seba ke xo binkewtişî ra bixelisna PDKyî ra destek gêna. Dima ke Hakan Fîdan şi Başûrî PDK hîna zaf tewrê şerê vera ma bi. Tarîxê serewedaritişan de tim şarê ma rîyê xayîn û hemkaran ra ser nêkewt. Ewro zî PDK nê tarîxî dibare keno. PDKyî yewîya ma ya neteweyîye parçe kerde. PKKyî ra nêbîyêne têkoşînê azadîya Kurdîstanî rew ra ameyêne çinkerdene. Ewro dewleta tirke wazena Başûrî bivisna binê kontrolê xo. Heyf ke PDK nê warî de hetkarîya dewleta tirke keno. Yanî dewleta tirke PDK kerd qoricî. 

PDK seba menfaetanê xo Başûrî roşeno dewleta tirke. Girê Hekarî, Çarçel û Girê Amedîyê de leşkerê dewleta tirke bi destekê PDKyî ca dayî xo. Teşrîna verêne de keyeyê Barzanîyan Koyê Barzanî zî seba îşxalê dişmenî akerd ke qaşo no koy seba nê keyeyî fîraz o. Mexmûr de ma hêzê xo yê peyênî zî apey antî. PDKyî no sey firsendî dî û kerd ke Mexmûr de ca bido xo. Ancî herêma Biradostî de zî PDK keno ke cabido dewleta tirke û MÎTî. Yanî 

Aseno ke 2023-2024 de şer ancî bi giranî dewam bikero. Ganî şarê ma, dormeyê sosyalîst û çepgîrî, cinîyî û hêzê vera sîstemî goreyê ney çarçewa Şerê Şarî yê Şorişgêrî de xeta xopawitişî bihêz bikerê û xoverdayîşî vila bikerê. 

Seserra diyîne ya Komara Tirkîya beno ke seba çareserîya meseleya kurdan biba firsendêkî. Ganî şarî na çarçewe de yewîya xo awan bikerê. Eke ma têkoşînê xo pîl bikerê eşkenê sîyasetê înkar û îmha bin bivisnê. Ma do bi têkoşînê hîna radîkalî dişmenî bin bivisnê û cuya azade awan bikerê. Nê esasî ser o ez her kesî rê serkewtiş wazena.''