Endamê Polîtburoyê YNKyî Arêz Ebdullahî derheqê rewşa peyêne ya Başûrê Kurdîstanî de bi taybetî zîyaretê Wezîrê Pawitişî Hulusî Akarî de ANFyî rê qisey kerd.

Ebdullah bale ante armancê plananê Tirkîya yê seba Şingalî ser û vat: ''Dewleta tirke pê nê planan wazena Rojawan û Başûrê Kurdîstanî îşxal bikera. Înan seba menfatanê xo Tirkîya zîyaret kerde. Eke Tirkîya xo biresna Şingal hînî eşkena Iraq û Sûrîye zî kontrol bikera. Tirkîya vana ê do heta 2023 sînoranê Tirkîya hîra bikerê. No yeno a mana ke nê do Mûsil bigêrê binê kontrolê xo. Xora Sûrîye û Iraq nê planê înan tesdîq nêkenê. Ez vana Amerîka sey wextê Trumpî hînî do her waştişê Tirkîya nêyera ca. Ganî kurdî vera nê planan hîşyar bibê û wa dişmenî rê hemkarîye nêkerê.''

Ebdullahî peynîya qiseykerdişê xo de ard ziwan ke pêkerişê nimiteyî yê mabênê PDK û dewleta tirke nîşan kerdî û vat: ''Na hemkarîya PDKyî ya bi Tirkîya neteperwerîye nîya. Ganî PDK nê pêkerdişan eşkera bikero. A raşte Tirkîya hukmatê Herêma Kurdîstanî nêgêno cidî. Heta nika Tirkîya rayîr nêda ke Herêma Kurdîstanî Anqara de temsîlkarîye abikero. Coka Tirkîya xîret kena ke tay kesan û partîyan ser o bazarîye kena. Tirkîya têna wazena pêro kurd û dezgehanê kurdan, partîyanê kurdan çin bikera, bifetisna û tasfîye bikera.''