Kongreya 23. ya KNKyî bi tewrbîyayîşê delegeyan ê  çar hetanê Kurdîstanî ameye kerdene. Kongre de Zeynebe Murad û Ahmet Karamus reyna sey hemserekanê KNKyî ameyî vîjnayene.

Kongre de deklarasyono hempar ame eşkerakerdene. Deklarasyono ke hetê Endamê Konseya Rayberdişî ya KCKyî Zubeyîr Aydarî ra ame wendene, wina yo:

''Çar parçeyanê Kurdîstanî û teberê welatî ra bi desan partî, rêxistinê Kurdîstanî û şexsîyetê xoserî tewrê kongre bîyî. Kongre de rewşa Kurdîstanî û dinya ameye munaqeşekerdene. Kongre ya ke sey îstîşareyêkê neteweyî ameye kerdene netîceya ci no deklarasyon ame hazirkerdene.

Rojhelatê Mîyanênî de averşîyayîşê muhîmî qewimîyenê. Tirkîya û Kurdîstan de semedê çareserkerdişê meseleya kurdan munaqeşe û cehdkerdişê dîyalogî dewam kenê. Mabênê Birêz Abdullah Ocalan û dewleta tirke de muzakereyî yenê rayraberdene. Netîceya nînan de Bizêr Ocalanî 27ê sibata 2025î de Vengdayîşê Haştîye û Komelê Demokratîkî kerd. PKKyî mabênê tarîxanê 5-7ê gulane de kongreya xo kerd û 12ê gulane de netîceya kongre da eşnawitene û têkoşîno çekdar caverda. Vengdayîşê Birêz Ocalanî û qerarê PKKyî sey gamanê tarîxîyan dînya de veng da. Hêzanê mîyanneteweyîyî û partî û rêxistinanê kurdan paştî daye prosesî û dewleta tirke zî proses pozîtîf verwazî kerd.

Ma zî paştî danê ci û seba ke proses bi serekewtişî aver şiro ma zî bi heme îmkananê xo bixebitê. Eke meseleya kurdan Vakur de bêro çareserkerdene no do tesîrê hîrê parçeyanê bînan zî bikero. La heme proses aver nêşîyo. Hukmatî hema gama muhîme nêeşta û ziwanê ci ziwanê haştîye nîyo. Operasyonê leşkerî, bombarduman û hêrişê bi çekanê kîmyewîyan dewam kenê. Na rewşe nîna qebulkerdene. Coka ma veng danê heme kurdan, dostanê ci û dezgeh û hêzanê mîyanneteweyîyî ke wa paştî bidê nê prosesî. Ma veng danê selahîyetdaranê dewleta tirke ke wa gamanê ke hewce kenê bierzê. Ma veng danê wird hetan zî wa sey hetê hîrêyinî beranê xo hêzanê mîyançîyan rê abikerê.

Rewşa Îran û Rojhelatê Kurdîstanî ya peyêne

Rejîmê Îranî her hetî ra mîyanê krîzê girdî de yo. Îran semedê şaranê û bawerîyanê cîya cîyayan û bitaybetî semedê cinîyan bîyo zîndano akerde. Zextê serê cinîyan tim zêdîyenê. Na rewşe hinî nîna qebulkerdene û açarîyaye prosesê serewedaritişî. Badê qetilkerdişê cinîya kurde Jîna Emînî serkêşîya şarê  Rojhelatî de serewedaritiş ame destpêkerdene û heme Îranî ra ame vilakerdene. No serewedaritiş rixmê zextanê giranan hema dewam keno.  Rejîmê Îranî partî û rêxistinanê kurdan hedef geno û zextê vera şarê kurdî zêdîyenê. Şerê Rojhaletê Mîyanênî de tewr zaf tesîrê Îranî keno. Rejîmê Îranî nêeşkeno verê şarî bîgîro. Beno ke Îran de şorişêko newe bikewo rojdem. Coka têna kurdê Rojhalatê Kurdîstanî nê gerek pêro hêzê kurdan vera nê bedilnayîşan hazir bê. Kongreya KNKyî têkoşînê Rojhelatê Kurdîstanî selam kena û paştî dana ci.

Iraq û Başûrê Kurdîstanî

Iraq de rewşe têmîyankewtî ya. Statuyê Kurdîstanî zî binê tehlukeyî de yo. Iraq binê krîzê girdî de yo û hêzê teberî mudaxale kenê. Çarçewaya madeyê 140. de polîtîkayê erebkerdişî ameyî averberdene û xeylê kurdî cayê xo ra bîyî. Çi heyf ke hêzê kurdan nê dewrê krîtîk û tehlukeyin de pîya tênêgêrenê. Herêma Kurdîstanî de vîjnayîş ame kerdene la bi aşman o hema hukmato newe nêameyo ronayene û serek nêameyo vîjnayene. Vîjnayîşê ke payîz do Iraq de bêrê kerdene muhîm ê. Eke kurdî yew nêbi beno ke statuyo federal û destkewteyî bikewo tehluke.

Sûrîye û Rojawan

Sûrîye de şeş menganê peyênan de averşîyayîşê neweyî qewimîyayî. Rejîmê Baasî rijîya û hezanê selefîyan Şam de îqtîdar fîna dest. La no îqtîdar hukmê pêro welatî nêkeno. Mesele bena xorîn. Rixmo ke îdareyê Rojawanî reyde pêkerdiş ame kerdene meseleyî nêameyî çareserkerdene. Elewîyî yenê qirkerdene û eke tedbîrî merê girewtene beno ke qirkerdişî vera xirîstîyan û durzîyan zî bêrê kerdene. Îqtîdaro newe wazeno çarçewa neteweperwerîya ereban de sîstemê îslamî rono. Heqê cinîyan çîn hesibîyenê û vera şaran zextî zêdîyenê. Eke Sûrîyeya demokratîke nêro ronayene kaos do dewam bikero û welat bêro parçekerdene. Coka kurdî gerek zaf dîqet bikerî, dost û mutefîkanê xo zafêr bikerê. Konferanso ke Rojawan de mabênê hêzanê kurdan de ame kerdene muhîm o û serkewte bi. Ma sey KNKyî konferans û qeraranê ci selam kenê.

Erjnayîşo pêroyî

Kurdîstan de rewşe krîtîk û têmîyankewtî ya. La pîya bi tehlukeyan firsetî zî est ê. Dewletê îşxalkerî krîzanê girdan de gelç vejenê. Iraq de bêîstîkrarîye, Sûrîye de temîyankewtiş, prosesê bedilyayîşê Îranî, krîzê Tirkîya û averşîyayîşê sey şerê Filîstînî mojnenê ke Kurdîstan de statuko bedilyayo. Eke ma kurdî bibê yew, yewîya xo ya neteweyî xurt bikerê, ma eşkenê semedê pêro Kurdîstanî statuyê mendeyî biafirnê. Bi nê waştişî gerek pêro hêzê sîyasîyî, partî û şarê kurdî yê çar parçeyan dahîna xurtêr bêro têhet û tewirê xo yê welatperwerî û neteweyî ramojno. Wina ma eşkenê plananê dewletanê îşxalkeran betal bikerê. Nê dewrê hesasî de dîyalogê mabênê hêzanê kurdan hêvî dano. No eşkeno bibo bingeyê yewîya neteweyîye. Seba ke ma biresê nê hedefê erjîyayeyî ma sey KNKyî reyna veng danê  Ma konferansêkê neteweyî bikerê û hêzanê xo bikerê yew!''