Meclîsê Xoserîya Demokratîke yê Şingalî derheqê qewimîyayîşanê herÊme û provokasyonanê PDK û hukmatê Mustafa Kazimî de eşkerayîya nuştekîye daye û nê pare kerdî:

 ''Rixmê heme cehdkerdişê çare û dîyalogî yê Îdareyê Xoserî hukmatê Kazimî peyê kayan de yo. 18ê nîsane de artêşa Iraqî bi fermanê hukmatê Kazimî hêrişê Asayîşê Êzidxanî yê Digurî kerd û têmîyankewtiş vejîya. Badê nê hêrişî 2ê gulane de artêşa Iraqî pê tanq û topan hêrişêko xurt kerd. Seba ke Şingal de şer zaf giran mebo, Îdareyê Xoserî yê Şingalî tay partîyanê sîyasîyan ê Iraqî reyde dîyalog û kombîyayîşî kerdî. Senî ke ma tim vanê ma reyna vat no şer semedê menfeatê Şingal û Iraqî nîyo. Xora rayapêroyîye zî zana pêvînayîşê ma dewam kenê.  La rixmê nê tewirê ma PDK û hukmatê Kazimî polîtîkayanê xo yê leminan canêverdenê.

Hukmatê Kazimî herinda şar, dezgeh û temslîkaranê Şingalî de pêvînayîş bikero reyna verê xo da PDKyî ke Pêkerdişê 9ê Teşrîna Verêne bêro domnayene. Îdareyê Xoserî yê Şingalî cehd keno ke probleman çareser bikero. La PDK hem herême de têmîyankewtiş vejeno hem zî  propagandaya sîyaye û polîtîkayanê şerî dano domnayene. Verî pê xebaranê zûran waşt şarê ma Şingalî ra vejo la nê planê ci nêtepişt. Nika zî provokasyonanê xo sey kombîyayîş û kayanê sîyasîyanê winayinan domneno.

Ma wazenê şarê êzidîyan rê nê vajê; PDK amadekarîye keno ke bi nameyê Şingal û êzidîyan heyetêkî bişawo Bexdadî ke hukmatê Kazimî reyde pêvînayîş bikero. No heyeto ke hetê Musul û PDKyî ra ameyo amadekerdene zafê înan endam û paştgêrê PDKyî yê.  Wazenê nê heyetî bi nameyê komelê êzidîyan û Şingalî bidê nasdayene. Ma ney sey dewamê Pêkerdişê 9ê Teşrîna Verêne vînenê. Çîyo ke pê hêrişê leşkerî û polîtîkayanê şerê taybetî dest nêfîna nika wazenê pê kayanê sîyasîyan bifînê dest. Ma nê kombîyayîşî nas nêkenê.

Ma sey Îdareyê Xoserî veng danê hukmatê Kazimî ke wa semedê çareserkerdişê prboleman zerrîya safî ra zelal tewir bîgêro. Kayê winayênî dîyalogî xeripnenî û rewşe xirabêre kenê. Eke raşta çareserî wazenê wa hêrişê komelê êzidîyan mekerê û îradeyê Şingalî nas bikerê. Ma veng danê şarê Şingalî ke wa wayîrê îradeyê xo vejîyê. Ganî şarê ma destûr medo ke kes û partîyê bînî bi nameyê ci komîyayîş bikero. Çunke ma zaf hole zanê ke Şingal xeymê înan de nîyo ê têna peyê menfeatê xo û eşîranê xo de yê.''