Endamê Koordînasyonê Komelê Êzidîyan Fîkret Îgret tewrê bernameyê Televîzyonê Çira TVyî bi û serebûtê peyênî yê Rojhelatê Mîyanênî ercnayî.

Îgrekî bale ante polîtîkaya îşxalî ya Rojhelatê Mîyanênî û ard ziwan ke Peymana Lozanî û Sykes Picotî ra nata meseleyê Rojhelatê Mîyanênî nêqedîyenê. Îgrekî vat: ''Welatê hegemonîkî wazenê Rojhelatê Mîyanênî ser o pêro armancê xo bîyarê ca. Înan seba ke Abdullah Ocalan verê nê armancan de astengêk dî vera ci Komployo Mîyanneteweyî kerd. 2014î ra nata zî Rojhelatê Mîyanênî ser o projeyê neweyî estê. Serekkomarê Tirkîya Erdoganî seba armancanê xo paştî daye cîhadîstan.

Hêrişê DAÎŞî yê vera Şingal û Rojawanî zî pabesteyê nê proje û dîzaynê neweyî yê. Sere de Tirkîya nê welatê hegemonîkî endamê NATOyî yê û bêvengîya NATOyî ra hêz û cesaret gênê. Nika Herêmanê PAwitişî yê Medya de şerê giranî estê. Şingalî ser o zî gefê peymane esto.

Nê şerî pêro seba dîzaynê neweyî yê Rojhelatê Mîyanênî yê. Tirkîya verî pê destê DAÎŞî têgêrayêne. Dima ke Têgêrayîşê Azadîye yê Kurdîstanî DAÎŞ bin kerd dewleta tirke verê xo da cergan û çeteyan. Dewleta tirke Rojhelatê Mîyanênî de serkêşîya şerî kena. Vera na hîşmendîya dewleta tirke kurdî û welatê bînî têkoşîn kenê.''