Komîsyonê Zîndanam ê Merkezî yê Komeleya Heqanê Merdima (ÎHD) şûbeyê xo  yê Amedî de raporê xo yê tepişteyanê nêweşan eşkera kerd. Goreyê Raporî zîndanan de tewr tay 335ê înan bi giranî, hezar û 412 tepişteyê nêweşî est ê.

Hemserekê Pêroyî yê ÎHDyî Huseyîn Kuçukbalabanî ke eşkerayîye de qisey kerd, nê vatî: ''Binpaykerdişê heqanê tewr giranî yê nê welatî zîndanan de qewimîyenê. Nê doneyî têna çîyê ke yenê zanayene ê yê. Seba ke texrîbatê şerê çewras serran werte ra bêrê wedaritene Abdullah Ocalanî veng da. A roje ra nata ma pêro dewlete ra gamêke pawenê. DEM Partî pêvînayîşê xo yê bi Wezîrîya Edaletî de vat semedê çareserkerdişê meseleya kurdan gama verêne û tewr muhîm serbestveradayîşê tepişteyan ê nêweşan o. Wezîrîya Edalatî gerek nê doneyanê ma bigîro û cade paketê bedilnayîşî bîyaro meclîsî.''

Dima ra rapor ame wendene. Rapor de goreyê zanayîşê ke ameyî ÎHDyî, pêvînayîşê avûkatan, mektub û muracatê merdimanê tepişteyan derheqê rewşa weşîye ya tepişteyan tesbîtî ameyî kerdene. Rapor de nê ameyî vatene: ''395 zîndananê akerde û qefilnayen de 403 hezar û 60 tepişteyî û hukmwerdeyî est ê. 161ê înan cinî hezar û 251ê ci camêrdî tewr tay 412 hezar û tepişteyî nêweş ê. Înan ra rewşa 335 kesan giran a û 260ê înan nêeşkenê têna miqatê xo bê, 150ê înan hewceyê hetkarî yê, 188 nêweşî gerek tim bêrê kontrolkerdene. ''

Rapor de detayê binpaykerdişan zî ameyî parekerdene, bale ameye antene pêkerdişanê neteweyî û mîyanneteweyîyî ser û seba ke tepişteyî bêrê tedawîkerdene û serbestveradayene pêşnîyazî ameyî kerdene.