Komîteya Rayberdişî ya PKKyî bi eşkerayîyêke 1ê Gulane Roşanê Karkeran fîraz kerd û derheqê prosesî de mesajê girîngî dayî. Eşkerayîye wina ya:

‘’Ma 1ê Gulane ancî sey roja têkoşîn, paştdayîş û yewîya sinifa karkeran pêşwazî kenê. 8ê Adare û Newroze ra dima 1ê Gulane de zî ancî şar, kedkar û karkerî do meydanan debikerê, têkoşînê demokrasîyî yê antîfaşîstî berz bikerê, seba cuya azade û rijîyayîşê faşîzmî biqîrê û seba komelê demokratîkî, azadîgîrê cinîyan û ekolojîkî têkoşînî aver berê.

Nê esasî ser o sere de ê Rayber Apoyî ma 1ê Gulane pêro cinî û ciwanan, kedkar û karkeran, embazan, şarê ma yê welatperwerî û dostanê xo rê fîraz kenê. Ma têkoşîn de pêro embazan rê serkewtiş wazenê, şexsê şehîdanê 1977î û şehîdanê ma Mehmet Karasungur, Mehmet Emîn Aslan û Ramazan Kaplanî de pêro şehîdanê 1ê Gulane yad kenê.

Ma embazê xo yê ercîyayeyî û têkoşêrî Sirri Sureyya Onderî rê şîfaya xeyrîne wazenê.

1ê Gulane mîraso tewr manadar û gandar ê sosyalîzmê reelî yo. Her çiqas zafê erjê sosyalîzmê reelî destî ra şîyê raştîya 1ê Gulane hema zî sey estareyî verê şaran roşnî keno û îlham dano.

Şarê kurdî û Têgêrayîşê Azadîye yê Kurdîstan bi xoverdayîşê tarîxî serkêşîya Rayber Apoyî de 8ê Adare û Newroze bi layîqî meydanan de manadar kerdî. Şarê kurdî û Têgêrayîşê Azadîye yê Kurdîstanî 1ê Gulane de do têkoşînê azadîye û demokrasîyî berz bikerê û cuya manadare do vejê werte. Mefhumê Medenîyetê Demokratîkî yê Rayber Apoyî zî raştîya 1ê Gulane hîna bimana û raşt kerd.

Şarê ma û têgêrayîşê ma bingeyê Vengdayîşê Haştîye û Komelê Demokratîkî yê Rayber Apoyî de 1ê Gulane pêşwazî kenê. Eşkera yo ke bê rêxistinîye û bê demokrasî haştîye nêbeno. Heta ke haştîye nêra Kurdîstanî Rojhelatê Mîyanênî de zî şer do nêqedo û haştîye nêra. Çunke modernîteya kapîtalîste bi parçekerdiş û kolonîzkerdişê Kurdîstanî şikl girewt. Coka haştîya dinya û Rojhelatê Mîyanênî bi haştîya Kurdîstanî mumkîn a.

Komelo Demokratîk tewiro xozayî yê cewherê merdimatîye îfade keno. Komelo demokratîk yeno mabaya komelo ekolojîk û ekonomîk, komelê azadîgîrê cinîyan, komelo sosyalîst û komelo konfederalîst. Cinî û kurdê ke bindest ê nînan rê komelo demokratîk û haştîye lazim o. Naye ra cinî û ciwanî, şarê ma û dostê ma do hîna zaf ferasetê Vengdayîşê Haştîye û Komelê Demokratîkî eşkera bikerê û çalakîyanê 1ê Gulane de ney bimojnê; paradîgmaya Modernîteya Demokratîke vila bikerê û ferasetê komelê demokratîkî yê enternasyonalîstî aver berê.

Ma wazenê ka wa Rayber Apo kongre îdare bikero

Seke rayaumûmîye û şarê ma zanenê ma wayîrê Vengdayîşê Rayber Apoyî vejîyê û nê di aşmanê peyênan de zî ma kerd ke goreyê ci têbigêrê. Ma eşkerayîyanê xo yê 1ê Adare û Newroze de zî no tewir eşkera kerd. Rixmê hêrişanê leşkerîyan û tênêgêrayîşê AKPyî ma hema zî tewirê xo rê dewam kenê. Ma kenê ke nêbê o teref ke prosesî herimneno û ma acele zî nêkenê. Heyetê Îmraliyî yê DEM Partî eşkerayîyanê pozîtîfan dano. Ma eşnawenê ke Rayber Apo hêvîdar o û xebatanê xo rê dewam keno. La seba caardişê Vengdayîşê 27ê Sibate hema zî çîyêko zelal çin o. Ma wazenê ke wa Rayber Apo bi azadî bixebito, bibo wayîrê şertanê serbestan û kongre îdare bikero.

Ma wazenê şarê xo û dostanê xo ancî hişyar bikerê û venga nînan bidê ke Vengdayîşê Rayber Apoyî bi serkewtişî bîyarê ca. Vengdayîşê 27ê Sibate seba ke dewlete û îqtîdar çîyêkî bidê ma nêame kerdene. La seba ke komel bibo demokratîk û azad ameyo kerdene. Haştîye zî komelo demokratîk zî bi ney mumkîn ê. Coka wa çew qesawet nêkero û çîyêkî mepawo. Bi wesîleya 1ê Gulane wa her kes seferber bibo û seba averberdişê rêxistinî, yewî û hişmendîye bixebito.

Wa her kes mezgê xo û terzê cuya xo bivurno. Eşkera yo ke Vengdayîşê Rayber Apoyî her çî ra ver vengdayîşêkê şorişê terzê cuye û mezgî yo. Wext wextê vurnayîşî yo. Hinî prosesêko winayên est o. Çew nêeşkeno verê nê vurîyayîşî bigêro. Rayber Apoyî vurîyayîşê xo yo şorişgêr kerdo. Nê esasî ser o PKK zî ho vurîyeno. Coka şarê kurdî, ciwanî û cinîyî do bivurîyê. 1ê Gulane û Menga Şehîdan a Gulane do bibê wesîleya nê vurîyayîş û vurnayîşî.

Nê esasî ser o ma ancî 1ê Gulane fîraz kenê. Ma şexsê Mehmet Karasungur, Hakî Karer û Hozane Mizgîne de pêro şehîdanê gulane bi rêz, minet û heskerdişî yad kenê. Ma venga şarê ma  û dostanê ma yê demokratîkan danê ke her ca de 1ê Gulane fîraz bikerê!’’