Înîsîyatîfê Kurdîstanî Bipawê Silêmanî de eşkerayîya çapemenîye kerd. Eşkerayîye de hêrişê dewa Gelalê ya Şerbajerî ame şermezarkerdene. Înîsîyatîfî venga her kesî da ke ewro 17.00 de tewrê çalakîya Silêmanî bibo.

Eşkerayîye de ame vatene ke Amerîka, Almanya û NATO paştî danê hêrişanê Tirkîya yê vera kurdan. Înîsîyatîfî vist vîrî ke înan Kunê Masî de keyeyêk zîyaret kerd û keyeyî ard ziwan ke Tirkîya seba hêrişanê xo PKK kena bahane.

Eşkerayîye wina dewam kena: ''Dima ke ma Kuna Masî ra agêrayî dewleta tirke hêrişê dewa Gelalê kerd ke nêzdîyê Kuna Masî ya. Tewirê qirkerdişî yê Tirkîya dewam keno. Tirkîya pê teknolojîya Ewropa hêrişê kurdan kena, hukmatê Herêma Kurdîstanî vera hêrişan bêveng o. Ma venga organîzayonanê Ewropa danê ke vera nê hêrişan bêveng nêmanê. Meverdê dewleta şima çekan roşa Tirkîya. Tirkîya nika seba awankerdişê Osmanîyan xîret kena. Ma tîya de şarê kurdî reyde yê û venga pêro dinya danê ke wa paştî bida kurdan.''

Eşkerayîye pê sloganê 'Tirkîya Kurdîstanî dana bombayan ver' qedîyaye.