Wekîlê HDPyî Tayîp Temelî pare kerd ke çar parçeyê Kurdîstanî kewtî verê pêlê şerê hîreyînî yê dinya û vat: "Nê şerî de destkewteyê Vakur, Başûr, Rojawan û Rojhelat benê hedefê îşxalkeran. Vera naye zî ganî kurdî bibê yew."
Komxebata Yewîya Neteweyî ya Xebata Yewîya Kurdîstanî ya ke bi tewrbîyayîşê Kongreya Komelê Demokratîkî (KCD) û 8 partîyanê kurdan 18-19ê çeleyê 2020î de Amed de ame kerdene vizêr bi beyannameyêkî qedîyaye. Wekîlê HDPyî yê Wanî Tayîp Temelî derheqê yewîya neteweyîye de ANF reyde qisey kerd.
Qiseykerdişê Tayîp Temelî ra beşêk wina yo:
"Erdê Kurdîstanî de şero hîreyîn ê dinya yeno kerdene. Nê şerî de pêro parçeyê Kurdîstanî hetê îşxalkeran ra yenê hedefkerdene. Nê prosesî de kurdî neçare yê ke tewirêkê hemparî bimojnê. Nika Vakurê Kurdîstanî de xîretê yewîya neteweyîye goreyê parçeyanê bînan hîna bizehmet ê. Çunke Vakurê Kurdîstanî de teda zorî û îşxal zaf ê.
Pêro rêxistinî, sîyaetê cîyayî û kesayetê cîyayî ameyî pêser û seba Vakurê Kurdîstanî yewîyêke senî do bêra awankerdene munaqeşe kerd. Na komxebate verê zaf provakasyonan bigêra. Ma reyan veng danê ke se beno wa bibo êyê ke nê xebate de va gênê seba tarîx û komelê kurdan têbigêrê.
Nika vera Kurdîstanî hêrişê pîlî estê. Hedefê nê hêrişan ra yew zî destkewteyê kurdan o. Kokê Tirkîya de dişmenîya kurdan esta. Îşxalkerî nêwazenê ke kurdî bibê wayîrê statuyêkî. Yewîye ra ber rayîrê pawitişî çin o. Nê prosesî de kurdî aktorê tewr pîlî yê Rojhelatê Mîyanênî yê.Coka ganî kurdîyewîya xo awan bikerê."
