Komxebata Îtîfaqê Kurdîstanî pê beşdarîya temsîlkaranê partîyanê xo derheqê dewaya qefilnayîşê HDPyî de Buroyê DBPyî yê Amedî de eşkerayîyêke daye çapemenîye. Serekê Partîya Komunîste ya Kurdîstanî (KKP) Sînan Çîftyurek û Hemsereka DBPyî Salîha Aydenîz eşkerayîye wende.

Çîftyurekî da zanayene ke HDP partîya 3. ya Tirkîya ya û sebebê na dewaya qefilnayîşî sebebêko sîyasî yo. Çîftyurekî vat: ''Na dewa vera demokrasî darbe ya.Dewleta tirke serranê 90an ra nata vera partîyanê kurdan neheqîye kena. PAK, PSK, KKP û PDK-T semedo ke tede çekuya Kurdîstanî esta safhaya peyêne ya qefilnayîşî de yê. Dewlete pê qedexe û astengkerdişan kena ke kurdan hîş bikera. Meseleya kurdan esta û ganî na mesele pê rayîrê demokrasî, haştî û dîyalogan çareser biba. Ma dewaya qefilnayîşî ya vera HDPyî û betalkerdişê wekilîya Omer Faruk Gergerlîogluyî bi xurtî şermezar kenê. Ma venga hêzanê demokrasî yê Tirkîya û mîyanneteweyî danê ke hetê HDPyî de ca bigêrê û vera na neheqîye vengê xo berz bikerê. Ma venga şarê xo danê ke bi xurtî tewrê Newroze bibê û îradeyê xo bimojnê. ''