Hemserekê DEM Partî yê Amedî Abbas Şahînî hêrişê vera kultur û ziwanê kurdkî ANFyî rê ercnayî.

Şahînî pare kerd ke hêrişê vera ziwan û kulturê kurdan bi serran o binê mezgê 'yew welat, yew milet, yew ale, yew ziwan'î de hetê dewlete ra yenê kerdene. Şahînî vat: ''Seba ke merdimî bi ziwanê xo deyîran nêvajê û govende nêgêrê dewlete bena asteng. Merdimî bi ziwan, kultur û govenda xo ciwîyenê.''

Şahînî îfade kerd ke hêrişê vera ziwan û kulturê kurdan bi taybetî ciwanan kenê hedef û vat: ''Bi taybetî wextê operasyonanê vera Başûr û Rojawanî de operasyonê destbendkerdiş û tepiştişî yê winayên Vakur de zêdîyenê. Kurdî ziwan û kulturê xo pawenê. Sloganê 'Bijî Serok Apo' xora sûc nîyo. La îqtîdar bi na bahane ciwanan keno hedef.''

Şahînî da zanayene ke kurdî do kultur û ziwanê xo ra fek vera nêdê û vat: ''Qeyûman 8 serran no çi ceribna. Hêrişê vera ziwan û kulturî dewamê polîtîkayanê înkar û îmha yê. Îqtîdar do bi kurdan nêeşkno. Rixmê teda û polîtîkayanê înkarî zî kurdan kultur û ziwanê xo ra fek vera nêda. Ma zî do qetî sîyasetê demokratîkî ra fek vera nêdê. Kurdî do tim wayîrê ziwan û kulturê xo vejîyê.''