Şingal de bi hezaran kesî vera peymana Bezdad-Hewlêrî ya serê Şingalî rayîrî ra şîyî. Çalakîkeran waşt ke wa Peymana Şingalî bêra betalkerdene û îdareyo xoser û Asayîşê Êzidxanî bişinasîyê.

Hukmatê Iraqî seba tasfîykerdişê hêzanê pawitişê Şingalî heta 1ê nîsane wext dayo Îdareyê Xoserî yê Şingalî. La şingalijî vera na bire xo ver danê. Şingalijan pê nê armancî çalakîyêka rayraşîyayîşî kerde.

Temsîlkarê dezgehan, rêxitinan, dîndar û bawermendê êzidîyî, hêzê YBŞ, YJŞ û Asayîşê Êzidxanî tewrê rayraşîyayîşî bîyî.

Rayraşîyayîşî heta Yermûkî dewam kerd û uca de eşkerayîyêke dîyaye. Eşkerayîye de ame vatene ke şingalijî do vera peymane îradeyê xo bipawê.

Hetê bînî ra 117 rojî yo êzidîyî seba paştdayîşê Asayîşê Êzidxanî çalakîya xeyme kenê.