Amed de bi se hezaran kesan şayîya Newroze de yew fekî ra vat: ''Ma pê adirê Newrozo xo ver bidê û ser bikewê.'' Bi se hezaran kurdan serê sibayî rew verê xo da Parka Newroze û pê coşêkê pîlî adirê Newroze vist ta. 

Girseyî alayê PKKyî û posterê Rayberê Şarê Kurdî Abdullah Ocalanî akerdî û sloganê ''Biciwîyo Serek Apo'' berz kerd. Rixmo ke polîsan mudaxeleyê vengî kerd pê slogananê şarî nêeşkayî. 

Hemwelatîya derheqê dewaya qefilnayîşê HDPyî de ANFyî rê qisey kerd.

Ciwanê bi nameyê Azad Yildizî vat: ''MHPyî Tirkîya vista destê xo û AKP îdare keno. HDP ewro meydanê Newroze yo. Wa AKP-MHP baş bizanê ke ha meydan ha HDP. MA do wayîrê partîya xo vejîyê ke 6 mîlyon rayî girewtî. Eke ê HDP biqeflnê zî ma do partîyêka bîne abikerê.  Ez venga pêro kurdan dana ke wa dormeyê HDPyî de kom bibê û wayîrê îradeyê xo vejîyê.''

Mamosta Salîhî vat: ''Dewlete ziwanê ma asîmîle kerdo la do nêeşka mezgê ma asîmîle bikera. Nika zî vera HDPyî dewa akerde. Wa biqeflna ma do yewda newîye abikera. Ez nê meydanê NEwroze de eşkera kena 'Partîya Şaran ê Xoverdayoxan' (PŞX). Ê çend biqefilnê ma do wina xo ver bidê.''

Dayîke Medîne Yildirim vat: ''Ma kurd ê, ma estê û ma do estbê. Pirnikê tirkan kurdanê tirşîkçiyan ra nêvêşayo. Nê kurdî yenê verê HDPyî de ronişenê. Hêzê kesî çin o ke partîya ma biqefilno. Kesê ke wazenê HDP biqefilnê wa verî Newroza Amedî biqefilnê. Mi polîsan rê zî vat 'şima ruhê mi zî bigêrê ez alaya xo nêdana şima.' Ê dişmenê Şêx Seîd û misilmanan ê.''

Ciwanê bi nameyê Veysî Gunduzî vat: ''HDPyî raya 6 mîlyonan girewte. Têna nê 6 mîlyonî eşkenê HDP biqefilnê. Qet yew hêz pê HDP nêeşkeno.''

Ciwana bi nameyê Ayşegule Soyut vat: ''HDP ewro tîya yo. Tirkîya de her roje cinîyî yenê qetilkerdene. Seba ke partîya ma heqê cinîyan pawena nika wazenê aye biqefilnê. La kes nêeşkeno vengê şaran hîş bikero.''

Ciwanê bi nameyê Muzaffer Çîçekî vat: ''Dozgero ke HDPyî rê dewa akerde wa Homa belaya ci bido. HDP partîya şaran a û kes nêeşkeno ey biqefilno. Biciwîyo HDP û biciwîyo têkoşînê şarê Kurdîstanî. ''

Cinîya bi nameyê Halîme Altay vat: ''Amed ewro cewabê na dewa da. No meydan ê kesanê ke Kurdîstan vurnayo goristan rê cewabêko tewr pîl o. HDP şar o û şar zî ho meydanê NEwroze de yo.''

Dayîke Nafîye Demîr vat: ''Ha meydan ha ma. Qet yew hêz nêeşkeno îradeyê ma teslîm bigêro. HDP îradeyê bi mîlyonan kesan o, vengê bi mîlyonan merdiman o.''