Başûr û Rojakewtena Kurdistanî de şar semedê wayîrvejîyayîşê Rojawanî payan ser o. Kurdistanijî bi çalakîyan wazenê vernîya îşxalî bêro girewtene û vanê Rojawan têna nîyo.

Pancşemeyî ra heta nika Rojakewtena Kurdistanî de çalakîyê protestoyî estî. Şaristanê Sineyê de komêka avûkatanê ser nameyê Sendîkaya Avûkatan ra veng da Neteweyê Yewbîyayeyî û Komara Îslamî ya Îranî ke hêrişanê îşxalkaran ê Tirkî bivindarnê.

Bi nameyê Kurdê Xorasanî eşkerayîyêke ameye weşankerdene, hêrişê îşxalkarî ameyî şermezarkerdene û ame vengkerdene ke verê Konsolosxaneyê Tirkî de pîya kom bibê.

Çalakîyî Başûrê Kurdistanî de zî dewam kenê. Zafê şaristanan tede di rojan ra nata çalakîyî ameyî viraştene û Şaristanê Helebçe, Keler û Senagerî de şar do bivejîyo meydanan û verba îşxalkarîye çalakîyanê şermezarkerdişî virazo.

Hewlêr de bi rayberîya KNK'yî zafê roşnvîr, nuştox û sîyasetmedarê Hewlêrî kom bîyî û înan parbe kerd ke verba îşxalkarîya do çalakîyan bikê û meydanê mîyanneteweyî de bikewê mabênê xîretan. Silêmanî de zi seba azadîye û serkewtişê Rojawanî Parka Azadîye de nimajê îneyî do bêro kerdene.