Vera hêrişê îşxalî yê dewleta tirke yo ke 17ê nîsane de vera Başûrê Kurdîstanî dîya destpêkerdene her hetî ra nêrazîbîyayîşî zedîyenê. Senî ke tay selahîyetdar û partîyanê Iraqî hêrişê dewleta tirke şermezar kerdî hemwelatîyê erebî yê kerkukijan zî ard ziwan ke vera îşxalî yê û veng da ke wa şarê Iraqî vera îşxalî bibê yew.

Ehmed Rehîmî vat: ''Ganî hukmatê Iraqî vera mudaxaleyê dewleta tirke û welatanê bînan ê vera Iraqî vindertişê xurtî ramojno û eşkerayîya fermî bido. Dewleta tirke bi nê hêrişî bandure û qanûnê bingeyî yê Iraqî geno bin lingan. Iraq de ganî helêke cuwa ver hukmato newe bêro ronayene û îşxal mehkemeyanê mîyanneteweyî de bêro munaqeşekerdene. Ganî hêrişê dewleta tirke yê vera Iraqî yê ke taybetî de vera kurdan yenê kerdene bêrê qeydkerdene. Dewleta tirke çim verdayo herra Iraqî.  Ganî heme netewî, şarî û partîyî yê ke Iraq de yê vera hêrişê dewleta tirke pîya têbigêrê û verê îşxalî bîgêrê.''

Reed Mihemed Ehmedî zî ard ziwan ke vera hêrişê îşxalî û operasyonanê leşkerîyan ê dewleta tirke yê vera Kurdîstan û herêmanê Iraqî yê û vat: ''Hêrişî û bombardumanî  bandura Iraqî binpay kenê. Îşxalê dewleta tirke beno sebebê bêkarîye û feqîrîye zî. Ma sey aktîvîstanê komelê sîvîlî vera feqîrîye û bêkarîye vejîyenê û veng danê heme iraqijanê ke wa vera hêrişî bibê yew. Dewleta tirke bi hêrişanê xo sîvîlanê masûman qetil kena. Ganî verê nê hêrişan bêro girewene.''