Vizêr reyna Mexmûrî hetê dewleta tirke ra dîya bombayan ver. Şarê Kampa Multecîyan ya Rustem Cûdîyî (Mexmûr) vera hêrişê dewleta tirke û bêvengîya Iraqî çalakîye kerde.

Şaro ke verê Komeleya Keyeyanê Şehîdan de ame  pêser bi sloganan û posteranê Rayberê Şarê Kurdî Abdullah Ocalanî heta verê banê Neteweyanê Yewbîyayeyan rayra şi. Tîya bi nameyê kampe eşkerayîye ameye dayene.

Badê rêzgirewtişê semedê Şehîdanê Azadîye yê Kurdîstanî bi nameyê şarê kampe endama Meclîsê Îştarî Nûrane Sezgîn qisey kerd.

Nûrane Sezgîn hêrişê vera Mexmûrî şermezar kerdî û vat: ''Ma dewleta tirke û hemkaranê ci şermezar kenê. Dewleta tirke her roje hêrişê kampe kena. No ecîzbîyayîş û bêhêzîya ci ramojneno. No hêrişo verên nîyo û do peyên zî nêbo. Şarê Mexmûrî heta ewro xover da ewro ra tepîya zî do xover bido. Dewleta tirke çiwext Herêmanê Pawitişî yê Medya de bin bikewo hêrişê sîvîlan kena. Têna dewleta tirke nê heme dewletê îşxalkerî û PDK hêrişê kurdan kenê. Dewleta tirke û îxanetê PDKyî do çirey ser nêkewo. Mexmûrî çirey verê çewî/e de çok nêda, do çok nêdo. Ma heqdar ê û do ser bikewê.''