Sêwrege de xeylî serrî yo ke tayê keyeyî, bi paştdarîya dewlete weçînayîşan de dest nanê îradeyê şarî ser. Şarê Sêwrege do 31ê Adare de şoro sandoqan ser û seba bedilyayîşî, seba demokrasî û haştîye reya xo bido. Sêwrege de şansê namzetanê HDP‘yî zêdeyo û derheqê weçînayîşî de xebatê muhîmî ameyî destpêkerdene.

'HÊVÎYA MI BI CHP NÊMENDA'

Turan Tuysuz verî parlamenterê CHP‘yî bi û no derheq de wina vano: “ Ez verî CHP de parlamenter bîya. La CHP’yî  Partîya Îyî de ame têhet û ez êdî ci ra hêvî nêkena. CHP xeylî bajaranê pîlan de saya HDP‘yî de serkewena la reyna zî tersena ke HDP de bêro têhet. Na nêweşîye ya. Bi no qeyde demokrasî nêno.“

'CINÎYÎ DO ŞAREDARÎYE DE BÊ'

Namzeta Hemserekîye ya HDP‘yî Emîne Çetînere zî va Sêwrege do bi HDP bîhnêka hîraye bigîro û wina dewam kerd: “ ma esnafî zîyaret kerdî, şîme keyeyanê şarê xo. Her kes qral û dîktatoran ver rincan bîyo. Xeylî projeyê ma estê. Projeyê tewr muhîmî zî projeyê ma yê seba cinîyan ê.  Şaredarîyanê Riha de cinîyî zaf asan nêameyî qebulkerdene la no bi xoverdayîşê cinîyan ame şikitene. Wexto ke Leyla Guvene bîye Hemsereka Vêranşarî zaf zehmetî ante, la peyê cû bi proje û hişmendîya xo  bîye serkewte. AKP cinîyan ra terseno. Ma do ser bikewê û şaredarîyan de cayê xo bigîrê.“