Vera xespkerdişê şaredarîyanê hîrê bajaranê pîlan ê Amed, Wan û Mêrdînî yê HDP’yî çalakîyî dewam kenê. Şarê Wanî vist vîrî ke qeyûman verî zî şaredarîya înan kerde deyndar û ard ziwan ke ê do şaredarîya xo pêser bîgêrê.

Hemwelatijan ra Ahmet Meteyî vist vîrî ke rejîmê AKP-MHP’yî îradeyê bi mîlyonan kesan xesp kerdo û va: ‘‘Kurdistan derbeyêka sîyasîye ameye kerdene. Rejîm vano ke welat de demokrasî û weçînitiş esto. Heme dinya dî ke Tirkîya de demokrasî çîn o.Xora şima îradeyê ma xesp kenê, şima qey sandiqan nanê ro û Tirkîya xapînenê. Ma sey şarê Wanî do heta peynî vera na neheqîye bivejîyê. Mi raya xo daya Bedîa û Mûstafayî. Ma do vera qeyûman heta girewtişê heqê xo xover bidê.Qeyûm neheqîye ya, zordarîye ya û zulm o. Ma do heta çilka peyêne ya gonîya xo dimayê heqîqet û partîya xo de şirê.‘‘

Atîye Şene zî va: ‘‘Qeyûm îradeyê şarî rê bêrêzîye ya. Coka ma qeyûman çi rey nas nêkenê. Qeyûmî verî hêrişê destkewteyanê cinîyan kenê. Ma vera qeyûman rayê xo dayê xo. Qeyûmî do reyna şaredarîyan deyndar bikerê. Wa vejî, şirê ma înan nêwazenê.‘‘

Hacer Kaya ya ke xespkerdişê qeyûmî sey derbeyêka sîyasîye name kerde ard ziwan ke ê nê qerarî nas nêkenê û va: ‘‘Ma do vera îşxalê şaredarîyan wayîrê îradeyê xo bivejîyê.Eke qeyûm şiro, şar do ser bikewo.‘‘

Necmettîn Kayayî zî nê vatî: ‘‘Îqtîdar bi qerarê qeyûmî wazeno ke Kurdistan de bêhuzurîye vejo. Şarî seba ke ê nê HDP înan îadere bikero rayê xo dayî. Ma nê qerarî qetîyen nas nêkenê û ma do kuçeyan de heta peynî vera qeyûman xover bidê.‘‘

Omer Borî zî bale ante ke dewlete bi qerarê qeyûmî qenunê xo binpay kena û va: ‘‘Ewro mesele qeyûmî nê mesele xespkerdişê îradeyê bi mîlyonan Kurdan a. Ê ke ma nasnêkenê, ma zî înan nasnêkenê. Bi sebebo ke hukmat tengayî de yo, hêrişê Kurdan keno. Ma do vera nê hêrişan kuçeyan de xover bidê. Seke ma tim vanê, Wan ê ma yo do ma rê bimano.‘‘

Rustem Unvertanî vera qeyûman hêrsê xo ard ziwan û va: ‘‘ Ma do şaredarîyanê xo reyna pêser bigêrê. Eke siba weçînitiş bibo, amancê ma bewlî yo.Na derbe tena vera Kurdistan nê vera heme şaranê Tirkîya bîyo. Ma nê zulmî qebûl nêkenê, xoverdayîşê ma do dewam bikero.‘‘

Vahap Ahmetoglûyî zî vera xespê qeyûmî reaksîyon da û va: ‘‘Weçînitiş de ma sey roşanî şaredarîye xo qeyûman ra pêser girewtî. La vera serkewtişê ma reyna qeyûmî ardî. Ma sey şarê Wanî do kuçeyan de adirê xoverdayîşî gur bikerê û şaredarîya xo rê wayîr bivejîyê.‘‘

Zeydîn Daghanî zî ard ziwan ke eke siba weçînitiş bibo ê do reyna raya xo bêdê xo û va:‘‘ Serkewtiş do ê ma bo.‘‘