Şarê Wanî rixmê pandemî û astengîya zî vizêr binê Keleya Wanî de meydanê Newroze kerd de. Wan de bi se hezaran kesan şayîya Newroze de vera tecrîdkerdişê Rayberê Şarê Kurdî Abdullah Ocalanî û dewaya qefilnayîşê HDPyî nêrazîbîyayîşê xo mojna.

Mehmet Koço ke pê kincanê tradîsyonelan tewrê şayîye bi vat: ''Kurdan tim vera zulmî milê xo çewt nêkerd û xurtêr xo ver da. HDP partîya ma ya. Wa Erdogan bizano ke kurdî do pê partîyêka newîye rayîrê xo rê dewam bikerê. ''

Selma Şîpala ke pê kes û sûr û zerdî xo girewtbi vat: ''Ma na Newroze dîyarîya xoverdayoxanê zîndanan kenê. Îradeyê kurdan pîl o û ma do partîyêka newîye awan bikerê. Ma do berê zîndanan bişiknê û Birêz Ocalan azad bikerê. Ma her wextî ra zêdêr bihêz ê.''

Kadere Ahmetoglu vat: ''Ma na dewa û betalkerdişê wekilîya Omer Faruk Gergerlîogluyî şermezar kenê. Înan Peymana Îstanbulî zî wedarnaye. HDP ma yo, ê nêeşkenê ma biqefilnê. ''