Şaredarîya Amedî 2016 ra nata hetê qeyûman ra yena îdarekerdene. Qeyûmê ke zanenê mende nîyê, dizdîye ra ber çîyêk nêkenê. Xebatkarê Şaredarîya Amedî ya qeyûmî zî hem dizdîye kenê hem zî kenê ke fuhuş şaristan de vila bibo.

Verî derheqê Hetkarê Sekreterê Pêroyî yê Şaredarîye Ercan Bîrcanî de îdîayê bêusûlîye est bîyî. Derheqê Bîrcanî de prosesê mehkeme dîya destpêkerdene. Bîrcano ke wextê HDPyî de wezîfe ra ame dûrvistene wextê qeyûm Munîr Karalogluyî de ame wezîfedarkerdene la dima reyna bi gerreyê Serekê Dayîreyê Ciwanan Mehmet Kesenî tepişîya. Bîrcan 'pê vilakerdişê dîmenanê şexsîyan ê Kesenî şantajî' yeno sûcdarkerdene.

Dîya zanayene ke mabênê Bîrcan û Kesenî de seba 'pênêkerdişê serê îhaleyêke' alozîye vejîyaya. Kesenî şantajî ra dima bira qeyûmî ser o gerreyê Bîrcanî kerd. Bircano ke camêrdê Mehmet Agarî yo, sey kiştoxê kurdan şinasîyeno. Kesen zî camêrdê Suleyman Soyluyî yo.

Ame parekerdene ke Soylu seba ke camêrdê ci karî ra ame girewtene qeyûm û serdozger wezîfe ra girewto.