Hemserekîya Konseya Rayberdişî ya KCKyî bi wesîleya serrgêra 46ine ya ronîyayîşê PKKyî eşkerayîyêke daye. Eşkerayîye wina ya:

''Ma serrgêra 46ine ya ronîyayîşê partîya ma PKKyî fîraz kenê. Bi vejîyayîşê PKKyî Kurdîstan de dewrê koletî, kolonyalîzmî û qirkerkerdişî qedîya û bingeyê azadîye de dewrêkê neweyî yê tarîxî dest pêkerd. Coka ma na gama manadare bi hîsanê şorişgêran selam kenê û sere de Rayber Apoyî rê, şehîdan rê şarê Kurdîstanî, gerîlayanê azadîye, milîtananê PKK û PAJKî rê, embazanê zîndanan rê, cinîyan, ciwanan, şaranê Rojhelatê Mîyanênî û dinya rê ronîyayîşê PKKyî fîraz kenê.

Ma şehîdanê demokrasî û şorişî ancî bi minet û hûrmetî yad kenê, heskerdiş û hesreta xo pêşkêşê înan kenê û bi rêzî rîyê xo verê vîrameyîşê înan de anê war. Ma soz danê şehîdanê xo ke ma do yadkerdişê înan qetî bîyarê ca.

Têkoşîno ke PKKyî serkêşîya ci kerda, teyna şarê kurdî ney kokê sîstemî yê Rojhelatê Mîyanênî lerznayî. Hêzanê modernîteya kapîtalîste destpêkê seserra 20ine de bingeyê menfaetan de dîzaynêko newe kerdbi ke paştîya xo dewleta neteweyîye ra gêno. Bi rayîrê dewleta neteweyîye çimeyê Rojhelatê Mîyanênî ameyî diznayene, şarî ameyî qirkerdene, tedaya nîjadpereste û faşîste ameye kerdene.

Şarê kurdî nê şaran ra yew bi ke bi temamî azadîye ra bêpar verdîyabi, amebi parçekerdene, înkarkerdene û çinhesibnayene. Hêzanê modernîteya kapîtalîste û hêzanê dewleta neteweyîye şarê kurdî rê neheqîye, bêrehmîye û namerdîye rewa dîbî. Welatê kurdan amebi parçekerdene, estbîyayîşê kurdan amebi înkarkerdene. La no sîstem bi têkoşînê serkêşîya PKKyî mîyanê krîz, kaos û tengîye de mend. Krîzo nikayên ê sîstemî yê Rojhelatê Mîyanênî bi esasî netîceya têkoşînê PKKyî de bîyo.

Bêguman wexto ke mana û mîrasê PKKyî benê babetê qiseyî  sîstemê cuya azade ya alternatîfe yena vîrî ke hetê Rayber Apoyî ra aferîyaya. Rayber Apoyî vera cuya modernîteya kapîtalîste paradîgmaya komelê azadîgîrîya cinîyan, demokratîke û ekolojîke afernaye, seba çareserîya meseleyanê Rojhelatê Mîyanênî projeyê neteweya demokratîke pêşkêş kerd û seba têkoşînê sosyalîzmî sîstemê konfederalîzmê demokratîkî aferba. Rayber Apoyî bi nê hawayî mojna ke seba çareserîya meseleyan wayîrê çareserîya tewr cidî yo. Naye ra dinya de her roje hîna zaf wayîrê fikranê Rayber Apoyî yeno vejîyayene û çar hetanê dinya de paştdayîşê bi şarê kurdî pîlêr beno. Hemleya Azadîye ya Mîyanneteweyîye zî nîşaneyan caardiş û rêxistinîya ney de eleqedar o. Coka merdim eşkeno bi rehetî vajo ke PKK sîyaset û mezgê serdestîya camêrdan, kolonyalîst û qirker ê modernîteya kapîtalîste vistê binê krîzî û bi nê hawayî modelê çareserîye afernayo. Coka vejîyayîşê PKKyî tarîxî yo, stratejîk o, îdeolojîk o û polîtîk o.

Krîteranê bingeyîyan ê cewherê PKKyî ra yew zî bêguman o yo ke PKK erj û qîmet dano cinîyan û azadîya cinîyan. Rayber Apo berê PKKyî heta peynî cinîyan rê akerd û averşîyayîşo esas ard ca. No krîtero bingeyîn bi şîarê 'Jin, Jiyan, Azadî' Kurdîstan de, Rojhelatê Mîyanênî de û dinya de serkêşîya cinîyan keno.

Ma ancî serrgêra ronîyayîşê PKKyî sere de şarê kurdî rê pêro şaran, cinîyan, dostan û bindestan rê fîraz kenê. Serra têkoşînî ya 47ine ya PKKyî de ma têkoşînê her kesî rê serkewtiş wazenê, selam û heskerdişê xo pêşkêş kenê û çarçewa Hemleya Azadîye ya Globale de venga pêro kesan danê ke seba awankerdişê cuyêka demokratîke ya komune û kesayetanê azadan hîna zaf ma bixebitê û têkoşîn bikerê.''