‘Şaredarîya Farqînî do bibo şaredarîya şarî’

Namzedê HDP’yî yê seba hemşaredarîya Farqînî Naşîde Toprake û Abbas Hîlmî Azîzogluyî derheqê fehmê xo yê şaredarîye û projeyanê xo de ANF’yî rê qisey kerd û vat, do qeraranê xo şarî dir pîya bigîrê û pîya rayra bixebitîyê.

Qezaya Farqînî ya Amedî ê qezayanê Kurdistanî ra yew a ke xoverdayîşê xoîdarekerdişî tede amebi kerdene. Namzedê HDP’yî yê hemşaredarîya Farqînî Naşîde Toprake û Abbas Hîlmî Azîzogluyî qalê fehmê xo yê şaredarîye û projeyanê xo kerd. Abbas Hîlmî Azîzogluyî bale ante serê xebatanê xo yê weçînitişî û ard ziwan ke wextê muracatan de waştişêko eşkera keweno vernî, o zî binfînayîşê zihnîyetê qeyûmî yo ke dest nayo serê şaredarîyan.

Azîzogluyî vat, “Rast o, dest nîyayo serê îradeyê şarî, şaredarî dest ra ameya girewtene. Waştişo bingeyên ê şarî no yo ke tavilî zihnîyeto talanker raste ra wedarîyo û şaredarî teslîmê şarî bêro kerdene. Kîtleya ma bicoş a û paweyê sibayê 1’ê Nîsane ya.” Azîzogluyî ard ziwan ke do pîya bi şarî qeraranê xo bigîrê û pîya bixebitîyê. 

 ‘FARQÎNÎ XEYLÎ REYAN XO NEWE RA AWAN KERD’

Azîzogluyî derheqê zirar û xirabîya ke qeyûmî şarîdarîye de viraşto vat, “Farqîn bajarêko qedîm o. Birastî zî hewt reyî ameyo raşanayene û her rey xo newe ra awan kerdo.”

Namzed Azîzogluyî ard ziwan, şarê Farqînî rixmê dej û zulmê giranî zî werişto payan ser, xo newe ra afernayo û vat, no şar bi mucadele û xoverdayîşê xo zî tim vejîyayo vernî.

 ‘MA DO DEMOKRASÎYÊ CAYÎYÎ XURT BIKERÊ’

Azîzogluyî vist vîrî ke Farqîn de serranê peyênan de xeylî dej ancîyayo û vat, “Tayê dejê ke ameyî antene teze bîyî, dest nîya serê şaredarî. Ma do wareyê îdareyê cayîyî de bi sîstemêk ke şar xo bi xo rayra beno û serê payan de maneno, vejîyê vernîya şarî. Bi nê hawayî ma do demokrasîyê cayîyî xurt bikerê. Ma do bi heme beşanê Farqînî dir bêrê têhet, qezaye newe ra awan bikerê û biresnê dereceya ke erjîyena. Bêguman ma do na yewe bi destûr û qerarê şarê xo bikerê.”

ZIWANÊ MAYE DO VERNÎ DE BO

Azîzogluyî bale ante ke seba pawitiş û averberdişê erjanê kulturkî û exlaqî yê şarê Kurdî do xebate bikerê û wina dewam kerd: “Ganî ma nê xovîr ra mekerê ke HDP partîya şaranê bindestan a. Yew nuqteya muhîme yak e HDP’yî partîyanê bînan ra cîya kena, na ya ke xîtabê her kesî kena. Hetêko ci yo muhîm zî partîya cinîyan bîyayîşê aye yo. Îqtîdaro mewcûd bi rayîrê qeyûmî dest da serê heqan û hêriş berd serê sazîyanê kultur û cinîyan.”

Azîzogluyî vist vîrî ke şaredarîyê înan heme bi fehmê zaf-ziwanîye têgêrenê û vat, “Kamcîn herême de bi kamcîn ziwanî yeno qisey kerdene bi ê ziwanî xizmet ameyêne dayene. Xusûsen zî Farqîn bi tarîx, ziwan, kultur û nasnameyê xo vejêno vernî. Farqîn de ziwano fermî Kurdkî yo. Qeza bi temamî bi Kurdkî qisey kena. Naye ra şarê ma xo bi kamcîn ziwanî îfade keno, ma do bi ê ziwanî xebate bikerê.” Azîzogluyî ard ziwan ke no şar her tim ziwan, kultur û nasnameyê xo rê wayîr vejîyayo.

 ‘QERARÎ DO ŞARÎ DIR BÊRÊ GIREWTENE’

Namzede Naşîde Toprake zî ard ziwan ke ê sey partîyanê sîyasîyan ê bînan bi propagandaye sozan nêdanê û vat, ‘Ma do bi fehmêkê winayênê tê bigêrê ke heme qerarî do şarî dir bêrê girewtene. Dimayê 1’ê Nîsane ma do mehla û dewan de heme perçeyan dir kombîyayîşan virazê û seba Farqînî çi lazim bo, ma do cehd bikerê ke ê çîyan bikerê. Beno ke no çî problemêkê cinîyan, ciwanan yan zî domanan bo, beno ke no çî problem îqtîsadî û cimatkîyî bê. Ma do şarê Farqînî dir ronişê û cehd bikerê ke hemeyê problemanê înan rê çareyan bivînê. Şarê ma do mîyanê prosesê qerarî de û xebata awankerdişî de tim estbo.’

 ‘WAŞTIŞÊ CINÎYAN DO XEBATÊ SEREKEYAN RA YEW BÊ’

Toprake vist vîrî ke qeyûmê ke dest dayê serê şaredarîye verê her çîyî hêriş berd serê sazîyanê cinîyan û vat, “Berê keyeyanê ma yê stargeyî, merkezê ma yê mucadeleyê hemverê zextê serê cinîyan ameyî panayene. Mudurîyet û serekîyê daîreyanê cinîyan wezîfe ra ameyî girewtene. Çunke goreyê fehmê îqtîdarê AKP-MHP’yî ganî cinî keye de bimano. Dorê cinîyan qefilnenê. Ma do bi weçînitişan destkewteyanê xo newe ra bigîrê. Bi heman hawayî ma do Farqîn de goreyê waştiş û lazimîyanê cinîyan tê bigêrê. Waştişê cinîyan do xebatê ma yê serekeyan ra yew bê.”

KARÊ KOOPERATÎFÎ

Toprake vat ke Farqîn de do projeyê berdarîye bêrê hadrekerdene û vat, “Seba ke ciwanê Farqînijî qey karî nêşirê bajaranê rojawanî, ma do qeza de kooperatîfbîyayîşî biafernê. Bi nê projeyî ma do qezaya xo de îmkananê karî vejê werte. Xora eke kesêk qezaya xo de kar peyda bikero, do dest nê erdê bibereketî ra vera medo û do seba karî nêşiro yewna ca. Bi heman hawayî do cinîyî zî tewrê karî bibê û seba domanan zî ma do kreşan akerê. Cinîyî ma ra na yewe wazenê… Ma do sazîyanê xo kulturkîyan newe ra bixebitnê. Seba ciwanan zî ma do merkezanê sporî yê beşanê cîya cîyayan akerê.”

 ‘ŞAREDARÎ DO BIBO ŞAREDARÎYA ŞARÎ’

Seba persa, “Weçînitoxî do seba çîyî rey bide HDP’yî?” Toprake cewabêko winayên da: “HDP vernîya her çîyî partîyêka cinîyan a. Partîyêk ke wayîrê waştişanê ekolojî, azadî, aşitî û demokrasîyî ya. Ma qerardar ê ke bibê şaredarîyêka şarî. Şarê ma do zereyê na şaredarîye de xo bivîno. Xora şar şaredarîyêka winayêne wazeno. 1’ê Nîsane do bibo ê ma, reyna do bibo yê ma.”