Qeyûmê Şaredarîya Amedî taxa Fabrîka ya qezaya Bajarê Nû de 25 keyeyê 18 wayîranê banan bi xespî kerdbî malê dewlete û fermanê rijnayîşê înan dabî. Taxe de rijnayîş binê ablûqaya polîsan de dîya destpêkerdene. 

Şarê taxe ANFyî rê qisey kerd û pare kerd ke rixmo ke mehkeme bira vindarnayîşê rijîyayîşî daya qeyûm rijnayîşî ra fek vera nêdano.

Mehmet Emîn Yaprakî vat: ''Şaredarîye 2021 de venga ma da ke ma şorê heqanê xo bigêrê. La werte de heq çin o. Seba yew banî înan 100 hezar lîra da. Ma panc tenî 25 serrî yo nê banî de ciwîyayêne. Rixmê bira mehkeme zî karê rijnayîşî dewam keno. Werteyê zimistanî de înan ma eştî teber. Wa dewlete bêra heqê ma bida. Rixmo ke tapuyê ma est ê, heqê ma nêdîyeno. Kamca de 100 hezar lîra rê ban est o? Eke wina yew keye est o, wa walî şoro bihêrîno.''

Medîne Kurt vat: ''Ma hema zî şoq de yê. Na kerdene meşrû û heq nîya. Ma yew keye de 4-5 tenî ciwîyayêne. Nika eşyayê ma binê çamurî de yê. Înan eşt keyeyê ma ser û ma kerdî teber. Ma pêrîşan bîyî. Pereyê ma çin o ke ma pê banêkî bihêrînê yan zî kira bikerê.''

Abdurrahîm Koyunî vat: ''Şima halê ma vînenê. Bi hezaran polîsan taxe girewte binê ablûqa. Ma rê zulm yeno kerdene. Bi zorî ma keyeyê ma yê tapukerdeyî ra yenê vetene. Ma nê zimistanî de şorê kamca? Seba ke ê zanenê ke weçînayîşê şaredarîye de bin bikewê wina kenê. Na kerdena dewlete zulm o. Ma heqê xo wazenê. Di domanê min ê astengdarî est ê. Ez nêzanena ke se bikera.''

Kamîle Yaprak vat: ''Wa Homa heqê ma înan rê nêverdo. Înan çîyêkê ma nêda ma, ma rê zulm kerd. 28 serrî yo ma hê tîya de ciwîyayenê. Ma heqê xo wazenê. Ma rê 280 hezar lîra ameye dayene. Tewr pê 280 hezar lîra keye yeno hêrînayene? Ma werteyê zimistanî de bê keyeyî mendî.''