Meclîsê Keyeyanê Şehîdan ê Kantonê Efrîn-Şehba semedê 4 sîvîlanê ke Til Rifet de şehîd bîyî û şervanêkê HRE ke şehîd bi , Şehîdgehê Zozane Amanosî de merasîmê cenaza organîze kerd.

Dewleta tirke ya îşxalkere 23ê teşrîna verêne de hêrişê Til Rifetî kerd ke pabesteyê Kantonê Efrîn-Şehba yo. Hêrişan de sîvîlê bi nameyê "Cemîle Weqas Xelîl (37), Melek Şiyar (5), Îbrahîm Şêxo (55) û Mihemed Weqfî (47) şehîd bîyî.

Şervanê HRE Îskender Efrîn (Rohilat Murad) zî 23ê teşrîna verêne de merhaleya diyîne ya Xoverdayîşê Dewrî de şehîd bi.

Meclîsê Keyeyanê Şehîdan semedê 5 şehîdan merasîmê cenaza organîze kerd. Pîya bi hezaran kesan temsîlkarê Îdareyê Xoserî û dezgehan tewrê ci bîyî.

Şehîdî Nêweşxaneyê Avrînî ra ameyî girewtene û ameyî ardene Şehîdgehê Zozane Amanosî.

Endama Meclîsê Keyeyanê Şehîdan Hacere Miho vat: ''Ma top û tifinganê dewleta tirke ra nêtersenê. Ma do Şehba de têkoşînê xo xurtêr bikerê. Bi têkoşînê Erfîn û pêro Rojawanî ganî dewleta tirke serûbin bibo.''

Endama Meclîsê Kantonê Efrîn-Şehba Fewzî Mistefa zî nê vatî: ''Rayber Apoyî reyde di rojî verî pêvînayîş ame kerdene û ma rê selamî şawitî. Ma amede yê ke semedê azadîya Rayber Apoyî û waranê xo yê ke binê îşxalî de yê bedalan bidê. Hêrişê dewleta tirke nêeşkenê verê têkoşînê ma bigîrê.  Heta azadkerdişê heme herra ma, ma do têkoşîn bikerê.''

Fethî Mihemdî ke bi nameyê keyeyê şehîdan qisey kerd, vat: ''Ma tim do rayîrê şehîdan de şirê. Ma soz danê ke ma do qesasê şehîdan bigîrê.''

Badê qiseykerdişan belgeyê şehîdan ameyî wendene û dîyayî keyeyanê înan.