Hêrişê dewleta tirke ya îşxalkere yê vera Nêweşxaneyê Sidêkanîyê yê Şingalî de 4 şerwanê YBŞyî û 4 xebatkarê weşîye şehîd bibî. Şehîdî vizêr pê merasîmêkê girseyî ameyî definkerdene. Şehîdgehê Şehîd Dilgeş û Şehîd Berxwedanî de zî semedê şehîdan merasîmêko leşkerî ame kerdene. Merasîmî pê deqayêkê rêzgirewtişî dest pêkerd.

Dima nameyê Fermandarîya YBŞ-YJŞyî ser o Axîn Întîqam qisey kerd û vat: ''Ma soz danê  keyeyanê welatperweran ke hesret û waştişê şehîdan bîyarê ca. Nê hêrişê qirkerdişî do nêresê armancê xo.''

Nameyê Îdareyê Xoserî yê Şingalî ser o Azad Huseyînî qisey kerd û pare kerd ke hukmatê Iraqî mesuldarê nê hêrişan o û ganî vera hêrişan tewirêkê zelalî bimojno.

Keyeyanê şehîdan zî merasîm de qisey kerd û Rayberê Şarê Kurdî Abdullah Ocalanî rê zî mesajê serweşîye da.

Qiseykerdişan ra dima xebatkara weşîye Muhlîse Sîdar pê tîlîlîyanê dadîyan û sloganan ameye definkerdene.